რესპუბლიკური პარტიის ერთ-ერთმა ლიდერმა თინათინ ხიდაშელმა, საპარლამენტო არჩევნებისთვის საკუთარი ხმა უკვე დააფიქსირა.

ჟურნალისტებთან საუბრისას მან განაცხადა, რომ არჩევანი გააკეთა უკეთესი პარლამენტისთის და თავისუფლებისთვის. ხიდაშელმა ამომრჩეველს მოუწოდა, რომ დღეისათვის ყველას აეღო საკუთარ თავზე პასუხისმგებლობა:

"რა თქმა უნდა, ჩვენ გავაკეთეთ არჩევანი მეტი თავისუფლებისთვის, არჩევანი უკეთესი საქართველოსთვის, სადაც ქვეყანას ეყოლება უკეთესი პარლამენტი, რომელიც გააჩენს დებატების შესაძლებლობას, პარლამენტი სადაც იქნება კანონშემოქმედებითი პროცესი, რომელშიც იქნებიან პროფესიონალები, პარლამენტი სადაც დეპუტატებს აღარასდროს აღარ ექნებათ კვორუმის შეკრების პრობლემა, ჩვენ ხმა მივეცით ისეთ საქართველოს რომლისკენაც ყველა ერთად ვისწრაფვით, ევროპულ მრავალპარტიულ, მრავალფეროვან საქართველოს. მე მინდა ყველა ამომრჩეველს ვთხოვო, აღმოსავლეთში და დასავლეთში, ქალაქსა თუ სოფელში, არ დაიზარონ და მივიდნენ საარჩევნო უბნებში. ამ ერთ დღეს ყველამ ერთად ავიღოთ პასუხისმგებლობა საკუთარი ქვეყნის მომავალზე".