რუსთავი 2-ის გენერალური დირექტორის, პაატა სალიას თქმით, ამ ეტაპზე ტელეკომპანიის მყიდველი არ გამოჩენილა. როგორც მან ქრონიკასთან სატელეფონო საუბარში თქვა, თუ მყიდველი არ გამოჩნდება, საზოგადოებას სამომავლო გეგმებს გააცნობენ.

"საუბრები გაკოტრების შესახებ არის გადაჭარბებული. ამგვარი რამ არ იგეგმება, თუმცა იგეგმება კონკრეტული ღონისძიებები, რომელიც ხელს შეუწყობს კომპანიას ვალების გასტუმრებაში", — აღნიშნა სალიამ.

სტრასბურგის გადაწყვეტილებიდან თითქმის ერთი თვის თავზე, 12 აგვისტოს ცნობილი გახდა, რომ რუსთავი 2-ის 100-პროცენტიანი წილის მფლობელი, ქიბარ ხალვაში ტელეკომპანიას ყიდის. მყიდველის გამოჩენისთვის მას ერთკვირიანი ვადა ჰქონდა დაწესებული.

ხალვაშმა განაცხადა, რომ არხის გაყიდვასთან დაკავშირებით მხოლოდ მიხეილ სააკაშვილთან არ გამართავს მოლაპარაკებას, ყველა პოტენციურმა მყიდველმა კი სურვილის შესახებ საჯაროდ უნდა განაცხადოს. არხის მფლობელმა თქვა, რომ მხოლოდ იმ პირებთან ისაუბრებს, ვისაც საბანკო გარანტია ექნება ან საკონკურსო ანგარიშზე არანაკლებ მილიონ დოლარს განათავსებს. არხი გახდება მისი, ვინც ყველაზე მეტს გადაიხდის.

ქიბარ ხალვაშის მტკიცებით, ყველა სამართლებრივი საფუძველი არსებობის იმისათვის, რომ დაიწყოს კომპანიის გადახდისუუნარობის საქმის წარმოება. მისი განმარტებით, არხის დავალიანება 70 მილიონ ლარს უახლოვდება, საიდანაც 27 მილიონამდე საბიუჯეტო გადასახადია.

რუსთავი 2-ის წილების მფლობელობაზე პარალელურად დაობენ ტელეკომპანიის დამფუძნებლები, დავით დვალი და ჯარჯი აქიმიძე. ამავე დროს, არხის 30 პროცენტზე სასამართლოში დავობს კიდევ ერთი დამფუძნებლის, ეროსი კიწმარიშვილის ცოლი, ია კიწმარიშვილი.

რუსთავი 2-ის საქმე

ადამიანის უფლებათა ევროპულმა სასამართლომ რუსთავი 2-ის საქმეზე ევროპული კონვენციის არცერთი მუხლის დარღვევა არ დაადგინა. ეს ნიშნავს, რომ ძალაში დარჩა საქართველოს უზენაესი სასამართლოს გადაწყვეტილება, რომლის მიხედვითაც არხი ქიბარ ხალვაშს ეკუთვნოდა. გარდა ამისა, სტრასბურგის სასამართლომ საქართველოს უზენაესი სასამართლოს გადაწყვეტილების აღსრულების შეჩერების დროებითი მექანიზმიც გააუქმა. სწორედ ამ მექანიზმის გამო ვერ გადაიფორმა 2017 წელს ქიბარ ხალვაშმა რუსთავი 2.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. 18 ივლისიდან რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა. რუსთავი 2-ის ჟურნალისტები აცხადებენ, რომ ქიბარ ხალვაში ხელისუფლების გეგმას ახორციელებს და კრიტიკული მედიის დახურვა სურთ.