ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ ეკა ბესელიამ, ნაციონალური მოძრაობის ლიდერის, გივი თარგამაძის მანქანის აფეთქებასთან დაკავშირებით კომენტარი კიდევ ერთხელ გააკეთა. ტელეკომპანია რუსთავი 2-თან ჩართვაში, ბესელიამ განაცხადა რომ არეულობა ნაციონალური მოძრაობის ინტერესებშია:

"ჩვენი ხელისუფლება მსგავს სიგიჟეს და მსგავს წარმოუდგენელ ძალადობის ფაქტს და ასეთი მასშტაბის უკანონობას არასოდეს არ მოიფიქრებს და დაგეგმავს. დიახ, მე გავავლე პარალელები, რადგან არ დაელოდნენ და ბოკერია და სხვები აკეთებდნენ პირდაპირ ბრალდებებს ხელისუფლების მიმართ. გავიხსენე ხურჩის ეპიზოდი, რომელიც იყო დადგმული სპექტაკლი. განაჩენია უკვე დამდგარი ამ საქმეზე და არიან ადამიანები, რომლებიც იყვნენ სამართალდამცავ ორგანოებში მაღალ თანამდებობაზე. მახსოვს ციხის დადგმული ბუნტი და შეწირული უდანაშაულო ადამიანების სიცოცხლე, მახსოვს მუხროვანის დადგმული ამბოხი და ა.შ. მახსოვს მათ შორის თავისუფალი ზონის წარმომადგენლების გავრცელებული ინფორმაცია, რომ იქნებოდა დესტაბილიზაცია, არეულობა, დაანონსებული რევოლუცია, ასაფეთქებელი მანქანები და სხვადასხვა ძალადობა. ბუნებრივია ბევრი საფუძველია ეჭვის შეტანის, ამ ქმედების განმახორციელებელი თუ ინტერესების მატარებელი პოლიტიკური ძალის ირგვლივ. დადგმულმა მოვლენებმა და კადრებმა ჩვენი მოქალაქეების სიცოცხლეზე გამოიარეს".

4 ოქტომბერს, საღამოს, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. შემთხვევის შედეგად დაშავდა 5 ადამიანი, მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო