გალტ & თაგარტმა თბილისის მერიასთან პარტნიორობით, მცირე და საშუალო განთავსების ობიექტებისთვის, მხარდასაჭერი სემინარი გამართა. სემინარი შეეხო ისეთ თემებს, როგორიცაა: ტურიზმის და სასტუმროების, მათ შორის მცირე და საშუალო განთავსების ობიექტების მიმოხილვა, ფასების დინამიკა, კონკურენცია, ტურისტული ელექტრონული პლატფორმები, ასევე სასტუმროების პოზიციონირება, კრიზისების მართვა, საბანკო პროდუქტებისა და დაფინანსების ხელმისაწვდომობა.

"გალტ & თაგარტი წლების განმავლობაში საქართველოს ტურიზმის სექტორს მუდმივად აწვდის ბაზარს უახლეს ინფორმაციას ტურიზმში მიმდინარე ტენცენციებსა და მოლოდინებზე. გალტ & თაგარტის კვლევებს და პროგნოზებს ფართოდ იყენებენ როგორც ქართველი, ისე უცხოელი ინვესტორები. ამჯერად, თბილისის მერიის მხარდაჭერით გალტ & თაგარტმა ტურიზმის სფეროში დასაქმებულ მცირე და საშუალო კომპანიებს წარუდგინა პრეზენტაცია სექტორში არსებულ მდგომარეობასა და მოლოდინებზე, რომელიც რუსეთის სანქციებიდან გამომდინარეობს. პრეზენტაცია ასევე მოიცავდა შესადარისი ქვეყნების მაგალითებს და შედარებით პატარა სასტუმროების განვითარების დინამიკას" - განაცხადა გალტ & თაგარტის მმართველმა დირექტორმა, ოთარ შარიქაძემ.

"ქალაქ თბილისის მერიის ერთ-ერთი მიზანია, რომ ტურისტების ზრდასთან ერთად, გაუმჯობესდეს მათი მომსახურების ხარისხი. სწორედ ამიტომ, ჩვენ გადავწყვიტეთ დღეს ჩაგვეტარებინა სემინარი ამ დარგში მომუშავე კომპანიებისთვის, მცირე და საშუალო ბიზნესისთვის. მათთან ერთად განვიხილავთ თუ რა გამოწვევები არის დღეს ბაზარზე და როგორ შეიძლება ე.წ კრიზისულ პერიოდებში დავძლიოთ ეს გამოწვევები" - აღნიშნა დედაქალაქის მერის მოადგილემ, სოფიო ხუნწარიამ. მცირე და საშუალო განთავსების ობიექტებისთვის გამართულ სემინარზე საქართველოს ბანკის წარმომადგენლებმა დამსწრე აუდიტორიას მიაწოდეს დეტალური ინფორმაცია, თუ როგორ უნდა გამოიყენონ ბიზნესებმა ტურისტების მოსაზიდად თანამედროვე ციფრული მარკეტინგული არხები და რა ფინანსური შესაძლებლობები და პროდუქტებია ხელმისაწვდომი სექტორის მოთამაშეებისთვის.