შრომის უსაფრთხოების მოთხოვნით ორგანიზებული აქცია-მსვლელობის მონაწილეები საქართველოს პრემიერ-მინისტრთან, ეკონომიკისა და ჯანდაცვის მინისტრთან, ასევე თბილისის მერთან შეხვედრას ითხოვენ. აქციის მონაწილეებმა ამ მოთხოვნით ჭავჭავაძე გადაკეტეს და აცხადებენ, რომ იქამდე არ დაიშლებიან, სანამ ჭავჭავაძის #5-ში მომხდარ უბედურებაზე პასუხისმგებელი პირები არ დაელაპარაკებიან.

On.ge ყველა იმ უწყებას დაუკავშირდა, რომელსაც აქციის მონაწილეები მომხდარზე პასუხისმგებლობას აკისრებენ. როგორც პრემიერ-მინისტრის აპარატში, ისე ეკონომიკისა და ჯანდაცვის სამინისტროში განაცხადეს, რომ მინისტრები აქციის მონაწილეებთან მისვლას არ გეგმავენ. თბილისის მერის, კახა კალაძის პოზიცია უცნობია. მის პასუხს On.ge ამ დრომდე ელოდება.

თბილისში შრომის უსაფრთხოების დაცვის მოთხოვნით აქცია იმართება. აქციის მონაწილეები გუშინ, 31 მარტს ჭავჭავაძის #5-ში მშენებლობის დროს მომხდარ შემთხვევას აპროტესტებენ, რა დროსაც ორი მუშა დაიღუპა.

მთავრობის ადმინისტრაციასთან დაწყებულმა აქციამ მსვლელობის ფორმა მიიღო. აქციის მონაწილეებმა პროტესტის ნიშნად ჭავჭავაძის 5 ნომერში გადაინაცვლეს. აქციის მონაწილეების თქმით, ქალაქის მერი თბილისს სიცოცხლით სავსე ქალაქს ეძახის, თუმცა რეალობა ცხადყოფს, რომ ქალაქი სიკვდილითაა სავსე. "სიკვდილით სავსე ქალაქი" —სკანდირებენ ისინი რუსთაველის გამზირზე, სადაც მსვლელობის გამო გზის სავალი ნაწილი ჩაიკეტა.