გერმანიის ქალაქ ალენში ფინანსური დავალიანების გამო ერთ-ერთი ოჯახის კუთვნილი ძაღლი ვალების ამომღებმა ორგანიზაციამ eBay-ზე გაყიდა. ინფორმაციას ამის შესახებ The New York Times ავრცელებს.

მას შემდეგ, რაც ადგილობრივ ოჯახს ქალაქის წინაშე დავალიანება დაუგროვდა, ვალის ამომღებმა ორგანიზაციამ იმ დროისთვის ოჯახში არსებული ყველაზე ფასეული აქტივის ამოღება გადაწყვიტა. შესაბამისად, ერთი წლის ფრანგული ბულდოგი სახელად ედა ქალაქის მერიამ eBay-ზე 750 ევროდ გაყიდა. შემოსული თანხით ქალაქის ბიუჯეტი შეავსო.

ადგილობრივი გაზეთის ცნობით, ოჯახს ვალი მას შემდეგ დაუგროვდა, რაც ოჯახის ერთ-ერთმა წევრმა სამსახურებრივი ტრავმა მიიღო და პარალიზებულია. ოჯახში სულ ხუთი წევრია, მათ შორის სამი არასრულწლოვანი. სხვა გადასახადებთან ერთად ბოლო პერიოდში ოჯახი შინაურ ცხოველზე გადასახადსაც ვერ იხდიდა. ძაღლის შემთხვევაში გადასახადი წელიწადში, დაახლოებით, 100 ევროა.

ძაღლი ონლაინპლატფორმაზე პოლიციის ოფიცერმა მიკაელა ჯორდანმა შეიძინა. ძაღლის ისტორიია სწორედ ჯორდანის დახმარებით გახდა ცნობილი. მას შემდეგ, რაც ჯორდანმა ძაღლის ამბავი ადგილობრივ ჟურნალისტების მოუყვა, 1 წლის ფრანგული ბულდოგის ამბავი მთელმა მსოფლიომ გაიგო.

ჯორდანი ქალაქის მერიას სასამართლოში უჩივის. ჯორდანის თქმით, მან აღმოაჩინა, რომ ძაღლი ავადმყოფობდა. მისი ცნობით, მხოლოდ პირველ კვირაში ვეტერინარების მომსახურებაში მან 800 ევრო გადაიხადა. ჯორდანი სასამართლოში აღნიშნული თანხის კომპენსაციას ითხოვს.

ამბავმა ადგილობრივი ცხოველთა უფლებების დამცველი ორგანიზაციების უკმაყოფილება გამოიწვია. მას შემდეგ აქტიურად მიმდინარეობს მსჯელობა თუ რამდენად კანონიერი იყო სახელმწიფოს ქმედებები. ქალაქის ვიცე-მერის განცხადებით, მერიის გადაწყვეტილება სრულად შეესაბამებოდა ადგილობრივ კანონმდებლობას. ქალაქის ოფიციალური პოზიციის მიუხედავად, მოსახლეობის პროტესტი აღნიშნულ საკითხთან დაკავშირებით ბოლო დღეებში განსაკუთრებით მზარდია.

"გერმანელების სიყვარული ცხოველების მიმართ საყოველთაოდ ცნობილია, ამ მიმართულებით ყოველწლიურად მილიონობით ევრო იხარჯება. აქედან გამომდინარე, ოჯახის კუთვნილი ძაღლის გაყიდვა გერმანელებისთვის იგივეა, რაც საკუთარი ოჯახის წევრის გაყიდვა, მაგალითად ბაბუის", — ამბობს ადგილობრივი ცხოველთა უფლებების დამცველი ორგანიზაციის ხელმძღვანელი მარკ ტიშმანი.