UFC 229-ის მთავარი ბრძოლის გამარჯვებული ხაბიბ ნურმაგომედოვი გახდა. დაღესტანელმა მებრძოლმა ირლანდიელი კონორ მაკგრეგორი დაამარცხა. ხაბიბმა კონორი დანებებით (submission) მეოთხე რაუნდში დაამარცხა. დაღესტანელი მებრძოლისთვის ეს რიგით 27-ე გამარჯვება იყო, ნული მარცხის წინააღმდეგ.

ორთაბრძოლის დასრულების შემდეგ ხაბიბ ნურმაგომედოვი ოქტაგონიდან გადახტა და კონორ მაკგრეგორის გუნდის წევრებს დაესხა თავს. კონკრეტულად კი, ნურმაგომედოვის სამიზნე არტიომ ლობოვი იყო, რომელთანაც დაღესტანელს ცუდი წარსული აკავშირებს. ხაბიბის არასპორტული ქმედებების პარალელურად, ოქტაგონზე ნურმაგომედოვის გუნდის წევრები შეიჭრნენ და კონორ მაკგრეგორს ზურგიდან თავს დაესხნენ.

დაცვამ დაპირისპირებული მხარეები მალევე გააშველა, თუმცა სიტუაციის განმუხტვა შეუძლებელი იყო.

ამის გამო, კონორ მაკგრეგორი დაცვის თანხლებით გააცილეს დარბაზიდან. ხაბიბ ნურმაგომედოვს კი კუთვნილი ქამარი დენა უაითმა არ გადასცა, რადგან მისი აზრით ეს გულშემატკივრების გაღიზიანებას გამოიწვევდა.

ხაბიბ ნურმაგომედოვი ათეულობით ადამიანის ესკორტის ფონზე გავიდა ოქტაგონიდან. მას ირლანდიელი გულშემატკივრები სხვადასხვა ნივთებს ესროდნენ.

ამ გამარჯვებით ხაბიბ ნურმაგომედოვმა თავისი წაუგებელი სერია გააგრძელა და მსუბუქიწონითი კატეგორიის ჩემპიონობაც შეინარჩუნა. კონორ მაკგრეგორმა კი თავის პროფესიონალურ კარიერაში მეოთხე მარცხი იწვნია. ირლანდიელმა ოთხივე წაგებული ბრძოლა Submission-ით დათმო.

განახლება: კონორ მაკგრეგორზე და მისი გუნდის წევრებზე თავდასხმის გამო, პოლიციამ ნურმაგომედოვის გუნდის სამი წევრი დააკავა.