შინაგან საქმეთა სამინისტროს ინფორმაციით, დააკავეს პირი, რომელმაც 18 მაისს თბილისში, ჭავჭავაძის გამზირზე კაცს ესროლა. პირი ცეცხლსასროლი იარაღის მართლსაწინააღმდეგო შეძენა-შენახვა-ტარების ბრალდებით არის დაკავებული.

"გამოძიების პირველადი ინფორმაციით, თბილისში, ჭავჭავაძის გამზირზე, ლ. რ.-სა და მის ძმას - 1981 წელს დაბადებულ ზ.რ.-ს კონფლიქტი მოუხდათ 1992 წელს დაბადებულ გ.ვ.-სთან, რა დროსაც ლ.რ.-მ ცეცხლსასროლი იარაღიდან უმისამართოდ გაისროლა. სროლის შედეგად არავინ დაშავებულა. პოლიციამ ნივთმტკიცებად ამოიღო ცეცხლსასროლი იარაღი, რომლიდანაც გასროლა განხორციელდა", - აღნიშნულია შსს-ს განცხადებაში.

საქმეზე გამოძიება სისხლის სამართლის კოდექსის 236-ე მუხლით მიმდინარეობს. ამ მუხლით, სისხლისსამართლებრივი პასუხისმგებლობა ცეცხლსასროლი იარაღის მართლსაწინააღმდეგოდ შეძენა-შენახვა-ტარებისთვის დგება.

18 მაისს ფეისბუქის მომხმარებელმა თავის გვერდზე ვიდეო გამოაქვეყნა, სადაც მისი თქმით, ჩანს კაცი, რომელმაც მის ძმას ესროლა.