"ჯადოქარი ბურთით" - ცნობილი ფეხბურთელებისა და მწვრთნელების ფრაზები ინიესტას შესახებ

რამდენიმე დღის წინ ცნობილი გახდა, რომ ინიესტა სეზონის დასრულების შემდეგ ბარსელონას დატოვებს. კლუბს, რომელსაც 22 წლის წინ შეუერთდა და რომელთან ერთად ყველა შესაძლო ტიტული მოიგო, თანაც, რამდენიმეჯერ.

კატალონიურ კლუბში იგი 1996 წლიდანაა, როცა ახალგაზრდული კარიერა 12 წლის ასაკში დაიწყო.

ხავისთან და მესისთან ერთად ინიესტა ბარსელონას ეპოქალური გუნდის ერთ-ერთი მთავარი შემოქმედი იყო.

წარმოგიდგენთ გამორჩეული მწვრთნელებისა და ფეხბურთელების ფრაზებს ინიესტას შესახებ:

პეპ გვარდიოლა:

"ინიესტა თმებს არ იღებავს, არც საყურეს იკეთებს და არც ტატუ აქვს. შესაძლოა, სწორედ ამიტომაცაა, რომ მედიისგან ნაკლებ ყურადღებას იღებს, თუმცა იგი საუკეთესოა".

დავიდ სილვა:

"ჟურნალისტები ხშირად მეკითხებიან, ვინ არის საუკეთესო, მესი თუ რონალდუ? ჩემთვის კი ცხადი ისაა, რომ საუკეთესო, ეს ანდრეს ინიესტაა. მას მოედანზე გაცილებით რთული საქმის გაკეთება შეუძლია. ის არის ჯადოქარი ბურთით".

ზინედინ ზიდანი:

"იგი ჩემს თავს მაგონებს".

სერხიო რამოსი:

"ყველა დედას უნდა, რომ მის ქალიშვილს ინიესტასნაირი ბოიფრენდი ჰყავდეს. იგი საოცარი ფეხბურთელია და მხოლოდ ერთეულებს შეუძლიათ, რომ მას შეედარონ".

ხავი ერნანდესი:

"ინიესტა ესპანეთის ნაკრების ყველაზე სრულყოფილი ფეხბურთელია. მას ყველაფერი გააჩნია. მის გვერდით თამაში ძალიან ადვილია".

ლიონელ მესი:

"ანდრესი და მე ერთმანეთს ძალიან ვგავართ. ორივე ვიყენებთ საკუთარ სხეულს, რათა მეტოქეები ჩამოვიშოროთ, მაგრამ მას კიდევ გააჩნია რაღაც, რასაც აღფრთოვანებაში მოვყავარ. ხშირად არის მომენტი, როდესაც გგონია, რომ მას სადაცაა ბურთს წაართმევენ, მაგრამ არაფერი გამოსდით. იგი განსაკუთრებულად სწრაფი არაა, თუმცა გააჩნია უნარი, რომ მეტოქეს გასცდეს, ეს კი - ტექნიკიდან მოდის".

ლუკა მოდრიჩი:

"თუ ხალხი ინიესტას შემადარებს, ეს ჩემთვის პატივი იქნება. იგი ფეხბურთის ისტორიაში ერთ-ერთი საუკეთესო ნახევარმცველია. მიყვარს მის წინააღმდეგ თამაში. მისით აღფრთოვანებული ვარ".

ბოლო ამბები:

გირჩევთ