"ასაკის და ყველა ფაქტორის გათვალისწინებით ვითარება მარტივი ნამდვილად არ არის. ამჟამად პაციენტი იმყოფება ინტენსიური თერაპიის განყოფილებაში", — ასე შეაფასა სრულიად საქართველოს კათალიკოს-პატრიარქის, ილია II-ის ჯანმრთელობის მდგომარეობა სამთავრობო ტელეკომპანია "იმედის" ეთერში ჯანდაცვის უწყების ხელმძღვანელმა მიხეილ სარჯველაძემ. მისი თქმით, ექიმების მხრიდან ყველაფერი გაკეთდა საიმისოდ, რომ რაც შეიძლება მეტად ყოფილიყო უზრუნველყოფილი პაციენტის უსაფრთხოება.

"ექიმების მხრიდან ყველაფერი გაკეთდა საიმისოდ, რომ რაც შეიძლება მეტად ყოფილიყო უზრუნველყოფილი პაციენტის უსაფრთხოება. უკლებლივ ყველაფერი გაკეთდა ამისთვის, რა თქმა უნდა, ასაკის და ყველა ფაქტორის გათვალისწინებით ვითარება მარტივი ნამდვილად არ არის. ამჟამად პაციენტი იმყოფება ინტენსიური თერაპიის განყოფილებაში და მიმდინარეობს დაკვირვებაც და ყველა საჭირო ღონისძიების გატარება საიმისოდ, რომ რაც შეიძლება სწრაფად იყოს უზრუნველყოფილი სასიცოცხლოდ მნიშვნელოვანი ყველა პარამეტრი. დაკვირვება გაგრძელდება", — აცხადებს მიხეილ სარჯველაძე სამთავრობო ტელეკომპანია "იმედთან" საუბრისას.

კავკასიის მედიცინის ცენტრის დირექტორის, სოფიო ასპანიძის თქმით, "პატრიარქი შემოყვანილია კუჭიდან მასიური სისხლდენით, მას ჩაუტარდა შესაბამისი სამკურნალო დიაგნოსტიკური პროცედურები. მოთავსებულია კრიტიკული რეანიმაციის დეპარტამენტში. მდგომარეობა საყურადღებოა, ჰემოდინამიკა არასტაბილური გვაქვს" (ტელეკომპანია "იმედი").

ცნობისათვის, საქართველოს საპატრიარქოს ცნობით, "ჯანმრთელობის მდგომარეობის მოულოდნელი გართულების გამო საქართველოს კათოლიკოს-პატრიარქი ილია II ამჟამად კავკასიის მედიცინის ცენტრში იმყოფება".