გუშინ, შსს-მ პარლამენტთან და ინგოროყვას ქუჩაზე 10-მდე პირი დააკავა. პროტესტის მონაწილეების ინფორმაციით დაკავებულთა შორის არიან ტვ პირველის ჟუნრალისტი გიორგი მამნიაშვილი და "წიგნების თაროს" VIII სასკოლო სეზონის ჩემპიონი ოთო ირემაძე.

"საზოგადოებრივი პროტესტის პასუხად სისტემა ისევ უსაფუძვლოდ აკავებს მის მონაწილეებს. დაკავებულთა შორის კიდევ ერთხელ მოხვდა თაროელი, "წიგნების თაროს" VIII სასკოლო სეზონის ჩემპიონი და გადაცემის ისტორიაში ერთ-ერთი საუკეთესო მოთამაშე, ოთო ირემაძე.
ოთო არის ადამიანი, რომლის განათლება და ღირსება ყველა მისი ნაცნობისთვის სამაგალითოა.

სოლიდარობას ვუცხადებთ ოთოს და ვუსურვებთ მალე გათავისუფლებას!", — დაწერა "წიგნების თარომ" მათი მონაწილის დაკავების შესახებ.

ჟურნალისტი გიორგი მამნიაშვილის დაკავების შესახებ ინფორმაცია ტვ პირველმა გაავრცელა. მათი განმარტებით, ჟურნალისტი პროფესიულ მოვალეობას ასრულებდა.

"გიორგისთან კავშირი რედაქციამ 22:30 წუთზე დაკარგა. რამდენიმე წუთით ადრე მან რედაქციას აქტივისტების დაკავების კადრები გადმოუგზავნა", — დაწერა ტვ პირველმა.

არსებული ინფორმაციით, გიორგი მამნიაშვილი დიღმის დროებითი მოთავსების იზოლატორში გადაიყვანეს.

დაკავებულთა შესახებ შსს-ს ოფიციალური განცხადება ამ დრომდე არ გაუვრცელებია.