"რაც შეეხება შეერთებულ შტატებს, ჩვენ დიდი იმედი გვაქვს, რომ ურთიერთობები გადაიტვირთება, თუ "დიფ სთეითი" დამარცხდება ამ ბრძოლაში, რასაც ჰქვია ბრძოლა "დიფ სთეითსა" და ტრამპის ადმინისტრაციას შორის," — ამის შესახებ ოცნების პრემიერმა ირაკლი კობახიძემ აშშ-ში ორგანიზებულ ტრანსატლანტიკურ ვახშამთან დაკავშირებით დასმული კითხვის საპასუხოდ თქვა, სადაც საქართველო არ მიიწვიეს.

მისივე თქმით, თუ გაიმარჯვებს "დიფ სთეითი", გაგრძელდება სირთულეები".

"შეიძლება უფრო დემოკრატიულ ქვეყნებთან საუბრობენ და საქართველოსთან არ საუბრობენ, მაგრამ რაც შეეხება დემოკრატიას თავად გამოიტანეთ დასკვნები ყველაფერთან დაკავშირებით. რაც შეეხება დემოკრატიას, ადამიანის უფლებებს, ეკონომიკურ პოლიტიკას და ყველა პარამეტრს, სადაც ქვეყნდება რეიტინგები, ინდექსები, სადაც კონკრეტული კრიტერიუმების მიხედვით ფასდება ქვეყნები, ყველგან ვართ აბსოლუტური ლიდერები, დანარჩენი არის პოლიტიკა, შიშველი პოლიტიკა არის კონკრეტული პოლიტიკური ინტერესები, ჩვენ გვაქვს ჩვენი ეროვნული ინტერესები და როგორც ხედავთ, ბოლომდე ვიცავთ ჩვენს ეროვნულ ინტერესებს, როგორც პოლიტიკურ, ისე ეკონომიკურ ინტერესებს.

[...] რაც შეეხება შეერთებულ შტატებს, ჩვენ დიდი იმედი გვაქვს, რომ ურთიერთობები გადაიტვირთება, თუ "დიფ სთეითი" დამარცხდება ამ ბრძოლაში, რასაც ჰქვია ბრძოლა "დიფ სთეითსა" და ტრამპის ადმინისტრაციას შორის, ამ შემთხვევაში ურთიერთობები დალაგდება, თუ გაიმარჯვებს "დიფ სთეითი", გაგრძელდება სირთულეები, თუმცა ჩვენ სირთულეებსაც მიჩვეულები ვართ, ყველა შემთხვევაში ჩვენ ბოლომდე დავიცავთ ჩვენს ეროვნულ ინტერესებს, ვნახოთ როგორ გაგრძელდება პროცესები," — უთხრა ჟურნალისტებს ირაკლი კობახიძემ.

ჟურნალისტის კითხვაზე, რატომ არ მიიწვიეს მარკო რუბიოს მიერ გამართულ ტრანსატლანტიკურ ვახშამზე საქართველო, კობახიძე პასუხობს, რომ "კვლავაც მძლავრობს "დიფ სთეითი".

"ზოგადად, როდესაც დამოკიდებულებები არ იცვლება საქართველოს მიმართ, ეს ნიშნავს იმას, რომ კვლავაც მძლავრობს "დიფ სთეითი", ძალიან მარტივად არის აქ საქმე".

ჟურნალისტმა ჰკითხა ირაკლი კობახიძეს — "ე.ი ვერ "დაალაგეთ" "დიფ სთეითთან"", რაზეც ოცნების პრემიერმა უპასუხა, რომ ვერ დაალაგეს, რადგან "რადგან მათ უნდოდათ საქართველოსთან მეორე ფრონტის გახსნა".

"ვერ დავალაგეთ "დიფ სთეითთან", იმიტომ, რომ მათ უნდოდათ საქართველოსთან მეორე ფრონტის გახსნა. პირდაპირ იყო მათი წარმომადგენელი მოსული, პირდაპირ მთავრობის ადმინისტრაციაში შედგა ეს შეხვედრა სადაც ერთხელ ორჯერ მოითხოვა პირდაპირ მეორე ფრონტის გახსნა, ამაზე ვთქვით უარი და ამის შემდეგ გვიჭირს "დიფ სთეითთან" ურთიერთობების დალაგება," — თქვა კობახიძემ.

ცნობისთვის, ნიუ-იორკში აშშ-ს სახელმწიფო მდივნის, მარკო რუბიოს ინიციატივით გამართულ ტრანსატლანტიკურ ვახშამზე საქართველო არ მიიწვიეს. ვახშამს მსოფლიოს 40 ქვეყნის წარმომადგენლები ესწრებოდნენ, მათ შორის აზერბაიჯანიდან და სომხეთიდან.