კახა კალაძის ბანერის დაზიანებისთვის, კერძოდ "რუსული ოცნების" დაწერის გამო დაკავებულ 23 წლის აქტივისტ მეგი დიასამიძეს აღკვეთის ღონისძიების სახით 2000-ლარიანი გირაო შეეფარდა. გადაწყვეტილება მოსამართლე დავით კურტანიძემ გამოაცხადა.

მეგი დიასამიძე სასამართლო დარბაზიდან გაათავისუფლეს. მომდევნო სხდომა 28 ოქტომბერს 14:00 საათზეა ჩანიშნული.

"გადაწყვეტილებას ასეთს არ ველოდი. არ ვიცოდი რა ხდებოდა, საერთო ჯამში რომელი მუხლი იყო კონკრეტულად არ მესმოდა და რადგან მუხლია არ მესმოდა და ვერ ვხდებოდი საბოლოოდ რა გადაწყვეტილებას მიიღებდნენ და როდესაც უშუალოდ ადვოკატები ვნახე დარბაზში იქ მითხრა შოთამ და მარიამმა, რომ გიაროს ითხოვს პროკურატურაო და როცა გირაო მოითხოვეს გავთავისუფლდებოდი თუ არ გავთავისუფლდებოდი არ მქონდა ინფორმაცია და მოლოდინები არ მქონდა გათავისუფლების. პროკურატურის ბრალდებას და გამომძიებლების ბრალდებას, როცა შემოვიდნენ იზოლატორში და ბრალი წამიყენეს ვერანაირად ვერ დავეთანხმები... არ დამიცემინებია და ვერანაირად ვერ დავეთანხმები ცხადია.

...

თავდაპირველად მხვდებოდნენ შავებში ჩაცმული პოლიციელები და მერე მე ვითხოვდი ფორმა რატომ არ გაცვიათ მაშინ ბარათი მაჩვენეთთქო. სოციალურ ქსელში უბრალოდ არ ვწერდი, რომ იდენტიფიცირებას ახდენდნენ, რადგან ამას შიში არ გამოეწვია აქციის სხვა მონაწილეებში და სხვა ადამიანებში. საპატრულომ როცა გამაჩერა გამომძიებლები მოვიდნენ — რა ხანიან გაკვირდებით შენო და თურმე ვინ ყოფილხარო და მერე ორი საათის განმავლობაში ერთმანეთს შორის საუბრობდნენ და მერე ორი საათის შემდეგ ოქმი შეადგინეს და განყოფილებაში წავედით. განყოფილებაში დარეკვა ვითოვე, რაზეც უარი მითხრეს. იქ თქვეს, რომ 3 საათი შეგვიძლია არ დაგარეკინოთო, რაც იურისტებთან დავაზუსტე და მითხრეს, რომ იყო ტყუილი," — განუცხადა მეგი დიასამიძემ ჟურნალისტებს.

მეგი დიასამიძეს თბილისის მერის, კახა კალაძის საარჩევნო შტაბთან არსებული ბანერის დაზიანებას ედავებოდნენ. მას პროკურატურამ ბრალი 187-ე მუხლის 1-ლი ნაწილით წარუდგინა.