თბილისში ნარკოდანაშაულის ბრალდებით ოთხი პირი, მათ შორის ერთი ირანის მოქალაქე, დააკავეს. ამის შესახებ ინფორმაციას შსს ავრცელებს.

უწყების ცნობით, დიდი ოდენობით ნარკოტიკული საშუალებების უკანონო შეძენა-შენახვისა და რეალიზაციის ხელშეწყობის ფაქტებზე დააკავეს ირანის მოქალაქე, 1995 წელს დაბადებული ა.ს., ასევე საქართველოს მოქალაქეები: 2006 წელს დაბადებული ლ.გ., წარსულში ნასამართლევი 2004 წელს დაბადებული ს.ნ. და 1972 წელს დაბადებული ზ.გ.

შსს-ს ცნობით, ჩატარებული ჩხრეკის შედეგად, სამართალდამცველებმა ბრალდებულების პირადი და ავტომობილების სივრციდან, ასევე სხვადასხვა ლოკაციიდან ნივთმტკიცებად ამოიღეს სარეალიზაციოდ გამზადებული ნარკოტიკული საშუალებები, მათ შორის, გამომშრალი "მარიხუანა" და "მდმა".

გამოძიება საქართველოს სისხლის სამართლის კოდექსის 260-ე მუხლის (ნარკოტიკული საშუალებების უკანონო შეძენა-შენახვა) და 260-ე კვარტა მუხლის (ნარკოტიკების გასაღებაში დახმარება) შესაბამისად მიმდინარეობს. აღნიშნული დანაშაულები 12 წლამდე ვადით თავისუფლების აღკვეთას ითვალისწინებს, — ნათქვამია შსს-ს მიერ გავრცელებულ ინფორმაციაში.