უკრაინის პრეზიდენტმა ვოლოდიმირ ზელენსკიმ რომის კათოლიკური ეკლესიის მეთაური, ლეონ XIV, თავის ქვეყანაში მიიწვია.

"მე მისი უწმინდესობა უკრაინაში სამოციქულო ვიზიტით მოვიწვიე. ასეთი ვიზიტი ყველა მორწმუნეს, ჩვენს ყველა ხალხს რეალურ იმედს მოუტანს", — დაწერა მან ორშაბათს, 12 მაისს, Telegram-ზე ახალ პაპთან პირველი სატელეფონო საუბრის შემდეგ.

ზელენსკიმ რომის პაპს მადლობა გადაუხადა "ძალიან თბილი და ჭეშმარიტად შინაარსიანი" საუბრისა და უკრაინის მხარდაჭერისთვის.

"ჩვენ დიდად ვაფასებთ მისი უწმინდესობის სიტყვებს ჩვენი ქვეყნისთვის სამართლიანი და მდგრადი მშვიდობის მიღწევისა და პატიმრების გათავისუფლების აუცილებლობის შესახებ", — თქვა მან.

ზელენსკიმ ლეო XIV-ს ვატიკანის დახმარება სთხოვა რუსეთში დეპორტირებული ათასობით უკრაინელი ბავშვის დაბრუნებაში და აცნობა მას უკრაინის პარტნიორებთან 30-დღიანი ცეცხლის შეწყვეტის საკითხზე მიღწეული შეთანხმებების და უკრაინის მზადყოფნის შესახებ რუსეთის ფედერაციასთან ნებისმიერ ფორმატში მოლაპარაკებებისთვის. მისი თქმით, "უკრაინას ამ ომის დასრულება სურს და ყველაფერს აკეთებს ამისთვის. ჩვენ რუსეთისგან საპასუხო ნაბიჯებს ველით", — დასძინა მან.

იმავე დღეს, ლეო XIV-მ ვატიკანში პირველი ოფიციალური აუდიენცია გამართა, სადაც მსოფლიო მედიის წარმომადგენლები მიიღო. მან მადლობა გადაუხადა ჟურნალისტებს მშვიდობისა და ადამიანის უფლებებისთვის გაწეული შრომისთვის და ხაზი გაუსვა ეკლესიის სოლიდარობას მედიის წარმომადგენლების მიმართ, რომლებსაც თავისუფლება აღეკვეთათ "სიმართლის ძიებისა და გაშუქებისთვის". პაპმა ხაზი გაუსვა იმ ადამიანების გამბედაობას, რომლებიც სიცოცხლეს საფრთხეში იგდებენ სამხედრო კონფლიქტების გაშუქებისა და ინფორმაციის უფლების დასაცავად.

"მხოლოდ ინფორმირებულ ადამიანებს შეუძლიათ თავისუფალი გადაწყვეტილებების მიღება", —- თქვა პირველმა ამერიკელმა, რომელიც პაპობის ტახტზე ავიდა.

რამდენიმე ათასი ჟურნალისტის აპლოდისმენტების ფონზე, რომის პაპმა მედიის წარმომადგენლებს "სიტყვისა და პრესის თავისუფლების ძვირფასი საჩუქრის დაცვისკენ" მოუწოდა.