აშშ-ის საფონდო ბირჟაზე კვლავ მნიშვნელოვანი ვარდნა ფიქსირდება — დონალდ ტრამპის ტარიფებმა ინვესტორები დააფრთხო, მოსალოდნელი რეცესიის შესახებ ვარაუდებმა კი გამოიწვია ის, რომ ბირჟამ S&P 500-ის გასული თვის პიკის შემდეგ $4 ტრილიონის კაპიტალიზაცია დაკარგა.

S&P 500-ის ინდექსმა 2.7%-იანი ვარდნა განიცადა, რაც მიმდინარე წლის ყველაზე მკვეთრი დღიური ვარდნაა. Nasdaq-ის ინდექსმა კი 2022 წლის სექტემბრის შემდეგ ყველაზე დიდი დღიური, 4%-იანი კლება განიცადა. Dow Jones-ის ინდექსი 890 ქულით, ანუ, დაახლოებით 2%-ზე მეტით ჩამოქვეითდა.

"ჩვენ ნამდვილად ვიხილეთ სენტიმენტების დიდი ცვლილება. ბევრი რამ, რაც წარსულში მუშაობდა, ახლა აღარ მუშაობს", — განაცხადა Wealth Enhancement-ის ინვესტირების უფროსმა სტრატეგმა აიაკო იოშიოკამ.

Apple-სა და Nvidia-ს აქციებმა 5%-იანი, ხოლო Tesla-ს აქციებმა 15%-იანი ვარდნა აჩვენა, რაც კაპიტალიზაციის, დაახლოებით, 125 მილიარდით შემცირებას უდრის.

9 მარტს აშშ-ის პრეზიდენტს Fox News-თან ინტერვიუში ჟურნალისტმა ჰკითხა, მოელოდა თუ არა რეცესიას მიმდინარე წელს, რის საპასუხოდაც ტრამპმა ეს არ გამორიცხა.

ასევე იხილეთ: დეკემბრის შემდეგ, Tesla-მ თავისი ღირებულების 50%, $800 მლრდ-ზე მეტი საბაზრო კაპიტალი დაკარგა — მიზეზები