"მზია ამაღლობელიც და უფრო მძიმე შინაარსის მქონე დანაშაულში ბრალდებული პირი ერთი და იგივე კვალიფიკაციით არ უნდა გასამართლდნენ", — ამის შესახებ სოციალურ ქსელში საზოგადოებრივი მაუწყებლის ჟურნალისტი თეო ხუბულავა წერს და ბათუმელების და ნეტგაზეთის თანადამფუძნებელსა და დირექტორს, მზია ამაღლობელს სოლიდარობას უცხადებს.

"სამართალი, რომელიც ჩვენს ყოველდღიურ ცხოვრებაში გვხვდება და რომელიც ადამიანის უფლებებს განსაზღვრავს, გვეხება ყველას — მეც და შენც.

ის ყველაფერი, რაც სამართალში უკვე ნორმატიულად არის ასახული, მართალია, იურისტების საქმეა, მაგრამ რადგან ის მეხება მეც და გეხება შენც, შეგვიძლია ამის გასაგებად რაღაც ძალისხმევა გავიღოთ.

თუ სხვადასხვა სიმძიმის კატეგორიის კანონდარღვევაზე ადამიანები ერთნაირად გასამართლდებიან, ამით სამართლის პრინციპები მთლიანად მოიშლება.

სამართალი ქმნის გარკვეულ პრაქტიკას, რაც ნიშნავს იმას, რომ მზია ამაღლობელიც და უფრო მძიმე შინაარსის მქონე დანაშაულში ბრალდებული პირი ერთი და იგივე კვალიფიკაციით არ უნდა გასამართლდნენ.

ეს ანბანია იურისტებისთვის და სამართლიანობას კი არა, უსამართლობას ნიშნავს. ყველაფერს შესაბამისი სამართლებრივი შეფასება, სწორი კვალიფიკაცია და სწორი კოდექსი ჭირდება.

კიდევ ბევრი შეგვიძლია ვისაუბროთ იმაზე, რომ ასობით დაშავებული მოქალაქის საქმეზე, რომლებსაც ზოგიერთს დაზარალებულის სტატუსი მიენიჭათ, არ არის გამოძიებული არცერთი საქმე. სახელმწიფო ვალდებულია მსგავს ფაქტებზე რეაგირება მოახდინოს, ასევე მაღალია საზოგადოებრივი ინტერესი, მაგრამ ამ დრომდე არავის უგია პასუხი. ამ საქმეებზე კითხვების დასმა კი ჟურნალისტის საქმეა.

და რა თქმა უნდა — სოლიდარობა და თავისუფლება მზია ამაღლობელს", — წერს საზმაუს ჟურნალისტი.

დღეს სოციალურ ქსელში მზია ამაღლობელს სოლიდარობა კიდევ ერთმა ჟურნალისტმა, გენო ოსიყმაშვილმაც გამოუცხადა. მან დაწერა, რომ "არცერთი ის მოძალადე სამართალდამცველი 60 დღის თავზეც დაჭერილი არაა და ამის ფონზე, პოლიციელისთვის სილის გარტყმაზე მზია ამაღლობელი ციხეში ზის".