კენტერბერის უნივერსიტეტმა მიიღო გადაწყვეტილება, რომ 2025 წლის სექტემბრიდან ინგლისური ლიტერატურის საგნებსა და ხარისხს გააუქმებდა. ამან, რა თქმა უნდა, სტუდენტებსა და ლექტორებში პროტესტი გამოიწვია.

100-ზე მეტმა ადამიანმა მოაწერა ხელი პეტიციას, რომელიც მოუწოდებს კენტერბერის უნივერსიტეტს შეცვალოს გადაწყვეტილება.

ფრეია ჰოჯმა — მეორე კურსის სტუდენტმა, რომელიც ინგლისურ ლიტერატურასა და ისტორიას სწავლობს, პეტიციაზე ხელმოწერების შეგროვება დაიწყო, რადგან მისი თქმით, უნივერსიტეტის გადაწყვეტილება იყო "ქალაქ კენტერბერის ღალატი".

მან თქვა, რომ კენტერბერს "მდიდარი ისტორია აქვს", მწერლები, როგორებიც არიან კრისტოფერ მარლოუ, ჯეფრი ჩოსერი და აფრა ბენი სწორედ ამ ქალაქიდან იყვნენ.

უნივერსიტეტის სპიკერის განცხადებით, ბოლო წლებში ამ საგნის შესწავლის მსურველთა რაოდენობა შესამჩნევლად შემცირდა და შესაბამისად, ეს კურსი "სიცოცხლისუნარიანი აღარ იყო".

კენტერბერის უნივერსიტეტმა განაცხადა, რომ გააგრძელებს კურსის სწავლებას იმ სტუდენტებისთვის, რომლებიც ამჟამად პირველ ან მეორე კურსზე არიან. განცხადებაში ნათქვამია ისიც, რომ სტუდენტებს, რომლებიც სწავლობენ ინგლისურ ლიტერატურას შესაძლებლობა მიეცემათ სწავლა ალტერნატიულ კურსებზეც განაგრძონ. უნივერსიტეტი მხარდაჭერას უცხადებს ლექტორებსაც, რომლებიც კურსს ხელმძღვანელობენ.