საფონდო ბირჟებზე ასობით კომპანიის აქციაა, თუმცა, ყველა ერთნაირი არაა. აქციები განსხვავდება ღირებულებით, ფასით, ზრდის ტემპით, ისტორიით და სხვა მრავალი თვისებით. სწორედ ამიტომ, არსებობს აქციების კატეგორიები, რომლითაც შესაძლებელია მივხვდეთ აქციის წარსულს და სავარაუდო მომავალს.

1. ზრდის აქციები — Growth Stocks

ზრდის აქციები იმ კომპანიებს ეკუთვნით, რომელთა შემოსავლები, სხვა კომპანიებთან შედარებით, საშუალოზე სწრაფად იზრდება, რაც აქციების ფასებზეც აისახება. ამავდროულად, კომპანიის მენეჯმენტი ბიზნესის გასავითარებლად შემოსავლების რეინვესტირებას ამჯობინებს, ვიდრე დივიდენდების გაცემას.

სწრაფი მოგების მსურველი ინვესტორები სწორედ ზრდის აქციების ყიდვას ამჯობინებენ. Amazon (AMZN) ზრდის აქციების ერთ-ერთი საუკეთესო მაგალითია.

2. ღირებულებაზე დაფუძნებული აქციები — Value Stocks

აქციები, რომლებიც ღირებულებაზე არიან დაფუძნებული, ინვესტორების მიერ ნაკლები ფასით ივაჭრება, ვიდრე ამ აქციების რეალური, ბუნებრივი ფასია. ინვესტორები მსგავს აქციებს მხოლოდ იმიტომ ყიდულობენ, რომ ვარაუდობენ, ადრე თუ გვიან სხვები აქციების რეალურ ღირებულებას გაიგებენ და აქციასაც ფასი მოემატება, თანაც მსგავსი კომპანიები ხშირად გასცემენ დივიდენდებს. ღირებულებაზე დაფუძნებული აქციების კარგი მაგალითია Berkshire Hathaway (BRK.A, BRK.B) აქციები.

3. დივიდენდის გამცემი აქციები — Dividend Stocks

სახელი თავად ამბობს, თუ რა ტიპის აქციებია საფონდო ბირჟაზე. ამ აქციების კომპანიები ხშირად გასცემენ დივიდენდებს და ეს მათ საინვესტიციო პოლიტიკაშიც განსაზღვრულია. დივიდენდები შეიძლება გაიცეს ყოველთვიურად, კვარტალში ერთხელ ან ყოველწლიურად. დამწყები და საშუალო ინვესტორები ხშირად აბანდებენ თანხებს მსგავსი კომპანიების აქციებში, რათა რისკები მეტ-ნაკლებად დაზღვეული ჰქონდეთ. მსგავსი აქციების კომპანიაა Coca-Cola (KO), რომელმაც დივიდენდი ბოლო 100 წლის განმავლობაში გასცა, ხოლო უკანასკნელი 50 წელია, დივიდენდებს რაოდენობას ზრდის კიდეც.

4. ლურჯი ჩიპის აქციები — Blue Chip Stocks

ლურჯი ჩიპის აქციები იმ კომპანიებს ეკუთვნის, რომელთაც საფონდო ბირჟაზე და ზოგადად, ეკონომიკაში შესანიშნავი რეპუტაცია და ფინანსური მაჩვენებლები აქვთ. კომპანიებს აქვთ მდგრადი ფინანსური შემოსავალი, ბიზნეს მოდელი, ინვესტორებს დივიდენდებსაც ხშირად უხდიან, ხოლო კაპიტალიზაცია რამდენიმე მილიარდს სცდება. მსგავსი აქციები უმეტესად დაზღვეულია რისკებისგან. ლურჯი ჩიპის აქციის წოდება Apple-ს (AAPL) ნამდვილად ეკუთვნის.

5. იაფფასიანი აქციები — Penny Stocks

ამ შემთხვევაშიც, სახელი თავად აღწერს აქციის შინაარსს. იაფფასიან აქციებად ითვლება ის აქციები, რომელთა საბაზრო ფასი 5 აშშ დოლარზე ნაკლებია და შესაძლოა ერთი აქცია 1 ცენტზე გაცილებით ნაკლებიც ღირდეს. მსგავსი აქციები სპეკულაციებისადმი საკმაოდ მოწყვლადია, ვინაიდან მარტივია გავლენის მოხდენა, ნაკლები ინფორმაციაა კომპანიის ფინანსურ მდგომარეობაზე და აქციებს დაბალი ლიკვიდურობა ახასიათებთ. იაფფასიანი აქციების მაგალითად შეიძლება მოვიყვანოთ ფარმაცევტული კომპანია, რომელიც სამედიცინო წამალს იკვლევს, ფართო წარმოება დამტკიცებული არ აქვს, თუმცა, თუ დამტკიცდა, შემოსავლები საკმაოდ გაეზრდება.

აქციებით ვაჭრობა ახლა უკვე საქართველოს ბანკის მობილბანკით არის შესაძლებელი. ესტუმრე მობილბანკს, რომლის საშუალებითაც ისეთი საერთაშორისო კომპანიების ფასიანი ქაღალდებით ვაჭრობას შეძლებ, როგორებიცაა: Apple, Amazon, Microsoft, Tesla, Google და სხვა. ეს სიახლე საქართველოს ბანკმა მისი ჯგუფის შვილობილი კომპანიის, Galt & Taggart-ისა და საერთაშორისო ფინანსური ტექნოლოგიების პლატფორმა DriveWealth-ის პარტნიორობით დანერგა. თუ გსურს მეტი გაიგო ინვესტიციების შესახებ, ესტუმრე ფეისბუქგვერდს — ინვესტიციები, სადაც გაიგებ მეტს, თუ როგორ ივაჭრო აქციებით.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე, როგორც მოგება. თქვენ დეტალურად უნდა გააანალიზოთ, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა გასწიოთ თანხის დაკარგვის რისკი.