ჩვენი თითის ანაბეჭდები პინ კოდებსა და პაროლებს სწრაფად ანაცვლებს, რაც ნათლად აისახება თანამედროვე სმარტფონების უსაფრთხოების ფუნქციებში. მათი გამოყენება უფრო იოლია და ამასთან ერთად, ბევრად უსაფრთხოც. გარდა იმისა, რომ ვერავინ შეძლებს თქვენი თითის ანაბეჭდის გარეშე თქვენს მოწყობილობებთან უნებართვო წვდომას, თითის ანაბეჭდის სენსორებს ის პლუსიც აქვთ, რომ თუ პაროლი დაგავიწყდათ, ტელეფონი ან სხვა მოწყობილობა არ დაგებლოკებათ.

ამ ლოგიკას იქამდე მივყავართ, რომ მსგავსი ტექნოლოგია თანამედროვე საბანკო პლასტიკურ ბარათებსაც არ აწყენდათ. რამდენჯერ ყოფილა ისეთი შემთხვევა, რომ ბანკომატთან მისულებს საკუთარი პინკოდი დაგვიწყებიათ? (შეიძლება არც ერთხელ, მაგრამ ხომ არსებობენ გულმავიწყი ადამიანები?).

როგორც ჩანს, თანამედროვე ტექნოლოგიების სიკეთის გამოყენებაზე პირველი Mastercard დაფიქრდა. კომპანიამ ახალი თაობის პლასტიკური ბარათები შექმნა, რომელიც ტრანზაქციების შესრულების დამოწმებისთვის თქვენი თითის ანაბეჭდს ითხოვს. ამ ინოვაციის წყალობით, საბანკო ბარათების გამოყენება ბევრად უფრო უსაფრთხო გახდება.

ფოტო: Engadget / Cherlynn Low

ახალი ბარათები ტესტირებას სამხრეთ აფრიკაში გადის. კომპანია იმედოვნებს, რომ 2017 წლის ბოლოსთვის თითის ანაბეჭდიანი ბარათების გავრცელებას მთელი მსოფლიოს მასშტაბით შეძლებს.

როგორ იმუშავებს?

ვინაიდან თანამედროვე ბარათების ტესტირება დაწყებულია, უკვე შეგვიძლია ვთქვათ როგორ იმუშავებს ეს ტექნოლოგია.

პირველ რიგში, როგორც კი ბანკები მას დანერგავენ, მოგივათ ინფორმაცია რომ ახალი პლასტიკური ბარათების შეკვეთა შესაძლებელია. თუ დაინტერესებული იქნებით, მიხვალთ ბანკის სერვის ცენტრში, სადაც თითის ანაბეჭდს აგიღებენ. ამის შემდეგ, ანაბეჭდის დაშიფრული ციფრული ნიმუში ბარათის EMV ჩიპზე ჩაიტვირთება. თქვენ შეგიძლიათ ორი თითის ანაბეჭდიც ჩაატვირთინოთ ჩიპზე, თუმცა ორივე თითი თქვენი უნდა იყოს - არ შეიძლება ვინმე სხვას მიანიჭოთ თქვენი ბარათით სარგებლობის უფლება. მას შემდეგ, რაც მონაცემები ჩიპზე ჩაიტვირთება, თქვენ შეძლებთ ბარათის გამოყენებას მსოფლიოს გარშემო ინტეგრირებულ ყველა ტერმინალზე.

რაც ყველაზე სასიხარულოა, მოვაჭრეებს, თანამედროვე ბარათების მისაღებად, ახალი მოწყობილობების შეძენა არ მოუწევთ.

ახალი პლასტიკური ბარათი არ იქნება უფრო სქელი ან უფრო მძიმე. თითის ანაბეჭდის სენსორი ძალიან თხელი და პატარა, ფრჩხილის ზომის არის, რომელიც ბარათის მარჯვენა მაღალ კუთხეშია მიმაგრებული.