"გთხოვ მეგობარო, ესენი დავასუსტოთ, შენ არ დასუსტდე" — ასე მიმართავს ნაციონალური მოძრაობის ლიდერი ხატია დეკანოიძე დროას ლიდერს, ელენე ხოშტარიას. დეკანოიძე აცხადებს, რომ არ სურს ვინმე შიმშილობდეს, მაგრამ ხოშტარიას გადაწყვეტილება ურყევია.

"მართლა საშინელებაა უყურებ ადამიანი როგორ სუსტდება, ამ განცდით იმდუღრები... ელენე ძალიან, ძალიან გვჭირდება გარეთ, ძლიერი და ენერგიული როგორიც არის, მაგრამ იმდენად ურყევია გადაწყვეტილებაში, რომ ვერც ვერავინ ეტყვის გადამწყვეტად. ყველამ იცის, რა შემართება აქვს და რა პრინციპულია.

მაგრამ აქ ვეტყვი ფრთხილად, გთხოვ მეგობარო, ესენი დავასუსტოთ, შენ არ დასუსტდე. გთხოვ" — წერს ის ფეისბუქზე.

ხოშტარია მეხუთე დღეა შიმშილობს. მისი მთავარი მოთხოვნაა, ექსპრეზიდენტი მიხეილ სააკაშვილი სამოქალაქო კლინიკაში გადაიყვანონ. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.

დღეს, 7 ნოემბერს პარლამენტში სასწრაფო გამოიძახეს. ხოშტარია აცხადებს, რომ სასწრაფო დახმარება პარლამენტმა გამოიძახა და მას არ უთხოვია. მისივე თქმით, სუსტად არის, მაგრამ დრამატული არაფერი ხდება.

სასწრაფოს ექიმის განცხადებით, ხოშტარიამ მაგრამ გადასხმაზე უარი თქვა. მისივე თქმით, სასიცოცხლო პარამეტრები ოდნავ შეიცვალა, მაგრამ ნორმის ფარგლებში რჩება.

ამავე თემაზე: