საქართველოს ბანკი აგრძელებს მცირე და საშუალო ბიზნესის მხარდაჭერას და რეგიონებში მეწარმეობის განვითარების ხელშეწყობას. ბანკი რეგულარულად მართავს შეხვედრებს, რომლებიც მიზნად ისახავს ბიზნესებისთვის როგორც ადგილობრივი, ისე საერთაშორისო ფინანსური შესაძლებლობების გაცნობასა და პრაქტიკული განვითარების ინსტრუმენტების შეთავაზებას.

ამჯერად, მორიგი შეხვედრა ბათუმში, SOLO ლაუნჯში, მცირე და საშუალო ბიზნესის წარმომადგენლებისთვის გაიმართა. შეხვედრის მიზანი EBRD-ის ფინანსური, საგრანტო და საკონსულტაციო შესაძლებლობების გაცნობა იყო.

ღონისძიებაზე ადგილობრივ მეწარმეებს დეტალურად გააცნეს EBRD-ის მხარდაჭერის ინსტრუმენტები, რომლებიც ხელს უწყობს ბიზნესის განვითარებას, კონკურენტუნარიანობის ზრდასა და ახალი საინვესტიციო შესაძლებლობების გამოყენებას. მონაწილეებმა მიიღეს ინფორმაცია როგორც დაფინანსების ხელმისაწვდომ სქემებზე, ისე საკონსულტაციო პროგრამებსა და საგრანტო კომპონენტებზე.

აღსანიშნავია, რომ მსგავსი შეხვედრები მომავალშიც რეგულარულად გაგრძელდება. მათი მიზანია ბიზნესებისთვის ინფორმაციის ხელმისაწვდომობის გაზრდა და განვითარების შესაძლებლობების გაფართოება.