შაბათ საღამოს შემდეგ თუ თავში მხოლოდ ერთი სიტყვა გიტრიალებთ — ბანგარანგა, ბანგარანგა — მარტო ნამდვილად არ ხართ. ბოლოს და ბოლოს, ამ სახელწოდების მქონე სიმღერამ მსოფლიოს ყველაზე მასშტაბური მუსიკალური კონკურსი მოიგო.

საუბარია 27 წლის ბულგარელი პოპვარსკვლავის, დარას, იმავე დარინა იოტოვას, სიმღერაზე Bangaranga, რომელმაც წლევანდელ საიუბილეო ევროფესტივალზე ჟიურისა და ტელემაყურებლის უმაღლესი შეფასება დაიმსახურა და ბულგარეთისთვის კონკურსზე პირველი გამარჯვების მომტანი აღმოჩნდა.

თუმცა, დარას ჯერ კიდევ მოგებამდე გამუდმებით ეკითხებოდნენ, როგორ განიმარტებოდა "ბანგარანგა" და რა სათქმელი ჰქონდა მის საკონკურსო სიმღერას. ამიტომ, მომღერალმა, რომელიც ამავდროულად სიმღერის თანაავტორიცაა, ინსტაგრამზე საგანგებო პოსტიც კი მიუძღვა სიტყვის და კომპოზიციის მნიშვნელობის ახსნას.

დარას თქმით, სიმღერა უძველესი ბულგარული საკულტო-სარიტუალო წარმოდგენის შემსრულებლებით, კუკერით, არის შთაგონებული. კუკერი კაცები წინათ ბოროტი სულების განსადევნად სპეციალურ კოსტიუმებში გამოეწყობოდნენ ხოლმე. ევროვიზიის გამარჯვებული კი ამბობს, რომ ბანგარანგა მსგავსად ებრძვის "თანამედროვე დემონებს ჩვენში". იამაიკურ პატუას ენაზე სიტყვა "ბანგარანგა" თურმე "გიჟურ არეულობას" ნიშნავს, რაც განსაკუთრებულ დატვირთვას იძენს მომღერლის პირადი ამბის გათვალისწინებით: დარას თქმით, გასულ წელს მას შფოთვისა და ADHD-ის (ყურადღების დეფიციტისა და ჰიპერაქტივობის სინდრომის) დიაგნოზი დაუსვეს და სიმღერის ტექსტიც მათ დაძლევაზეა.

"ბანგარანგა ნიშნავს იმ მომენტს, როცა შიშს გადალახავ და სიყვარულს აირჩევ", — წერს მომღერალი, — "ესაა შენი 'ზე-მე', რომელიც შფოთვას, თავდაჯერების ნაკლებობას, სირცხვილის გრძნობასა და შინაგანს ქაოსს სძლევს. [...] ასე რომ, როცა ცხოვრებაში რთული პერიოდი გიდგას, არ იღელვო, იყავი ბანგარანგა".

ბანგარანგას წყალობით კი, ბულგარეთმა ბევრისთვის მოულოდნელი და ძალიან დამაჯერებელი ტრიუმფი მოიპოვა; დარა 2017 წლის შემდეგ პირველი გამარჯვებულია, რომელმაც უმაღლესი შეფასება მიიღო როგორც ჟიურისგან, ასევე ტელემაყურებლისგან.

ევროვიზიის ტრადიციისამებრ, კონკურსი მომავალ 2027 წელს სწორედ ბულგარეთში გადაინაცვლებს. მასპინძლობის სურვილი უკვე არაერთმა ქალაქმა გამოთქვა, მათ შორის, დედაქალაქმა სოფიამ, შავი ზღვის კურორტებმა ვარნამ და ბურგასმა.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...