გერმანიის სამხრეთში, ქალაქ ფაიჰინგენში პლასტმასის ბოთლი წარწერით — პოლონიუმ-210 იპოვეს. ამის შესახებ ინფორმაციას გერმანული მედია ავრცელებს.

საეჭვო ბოთლი 5 აპრილს ერთ-ერთ ბაღში სააღდგომო კვერცხების საძებნელად წასულმა ორმა მამაკაცმა იპოვა (გერმანიაში აღდგომა 5 აპრილს აღნიშნეს). მათ პოლიცია გამოიძახეს.

პოლიციის ინფორმაციით, გარემოს დაცვის სამინისტრომ პლასტმასის ყუთი შემთხვევის ადგილიდან გადაიტანა.

სახანძრო-სამაშველო სამსახურის წარმომადგენლის ინფორმაციით ინფორმაციით, ვიზუალური დათვალიერებით, ბოთლში შესაძლოა, მართლაც ყოფილიყო პოლონიუმი, თუმცა ბოთლის მახლობლად რადიაციული ფონი ნორმაში იყო.

აღნიშნული ნივთიერება განსაკუთრებით საშიშია ჩასუნთქვისას.

პოლიციის განცხადებით, საზოგადოებრივი უსაფრთხოების ინტერესებიდან გამომდინარე, სამინისტრო პასუხისმგებელია პლასტმასის პატარა ბოთლის შიგთავსის გამოკვლევაზე. ხელისუფლებამ ასევე უნდა დაადგინოს ბოთლის წარმომავლობა და ის, თუ როგორ მოხვდა ის ქალაქის განაპირას მდებარე ბაღში.

პოლონიუმი რადიოტოქსიკური ნივთიერებაა და, შესაბამისად, ძალიან საზიანოა ჯანმრთელობისთვის. რადიაციული დაცვის ფედერალური ოფისის (BfS) მონაცემებით, ნივთიერება განსაკუთრებით საშიშია ჩასუნთქვისას ან ღია ჭრილობების მეშვეობით კანში შეღწევისას. კრემლის ლიდერის, ვლადიმერ პუტინის კრიტიკოსი და სპეცსამსახურების ყოფილი ოფიცერი, ალექსანდრე ლიტვინენკო 2006 წელს ლონდონში სწორედ პოლონიუმ-210-ით მოწამვლის შედეგად გარდაიცვალა.