პოლონეთმა საქართველოს 20 მოქალაქე ქვეყნიდან გამოაძევა. ამის შესახებ ინფორმაციას პოლონეთის საზღვრის დაცვის სამსახური საკუთარ ოფიციალურ სოციალურ ქსელში ავრცელებს.

"საზღვრის დაცვის სამსახურმა, ევროკავშირის სააგენტო Frontex-თან თანამშრომლობით, უცხოელთა დაბრუნების კიდევ ერთი ოპერაცია განახორციელა — 15 ივლისს რადომიდან გამოფრენილი თვითმფრინავის ბორტზე პოლონეთი იძულებით დატოვა 40-მა უცხოელმა: მათგან 27 საქართველოს, ხოლო 13 — მოლდოვის მოქალაქე იყო.

20 ქართველის ქვეყანაში დაბრუნების იძულების წესით მოხდა და გადაწყვეტილება ეროვნული თავდაცვის, უსაფრთხოებისა და საზოგადოებრივი წესრიგის დაცვის საფუძველზე იქნა მიღებული. მოლდოველთაგან მსგავსი საფუძველი 9 მამაკაცზე გავრცელდა.

ერთ-ერთი ქართველი ქურდობისთვის 12-ჯერ იყო ნასამართლები, სხვები კი ნასვამ მდგომარეობაში ავტომობილის მართვისა და პოლონეთში არალეგალურად ცხოვრების გამო იყვნენ დაკავებული.

დაბრუნებულებს შორის უცხოელებისთვის საზღვრის არალეგალურად გადაკვეთის ორგანიზატორები და ხელშემწყობები იყვნენ, ასევე პირები, რომლებმაც პოლონეთში შესასვლელად საკუთარი პირადობის მონაცემები შეცვალეს," — წერია განცხადებაში.

ცნობისთვის, წელს პოლონეთი იძულებით ან ნებაყოფლობით უკვე 4.6 ათასზე მეტმა უცხოელმა დატოვა.