აჰუ დერიაი, ირანელი სტუდენტი, რომელიც რამდენიმე კვირის წინ თეირანში პროტესტის ნიშნად ჰიჯაბის გახდის გამო დააკავეს, თავისუფალია. ამის შესახებ ინფორმაციას ირანის სასამართლო ავრცელებს.

"იმის გათვალისწინებით, რომ საავადმყოფოში გაგზავნისას აღმოჩნდა, რომ ავადაა, ის ოჯახს გადასცეს. მის წინააღმდეგ საქმე არ აღძრულა," — განაცხადა ირანის სასამართლოს სპიკერმა, ასგარ ჯაჰანგირმა.

სტუდენტური მოძრაობა, რომელმაც აჰუ დერიაის კადრები გაავრცელა, ამტკიცებს, რომ თეირანის აზადის ისლამურ უნივერსიტეტში ქალზე დაცვის თანამშრომლებმა ფიზიკურად იძალადეს, რადგან ის ჰიჯაბის ჩაცმის წესს არღვევდა. ამის შემდეგ დერიაიმ პროტესტის ნიშნად ტანისამოსი სრულიად გაიხადა.

აჰუ დერიაის დაკავების შემდეგ ირანი აცხადებდა, რომ ქალს ფსიქიკური აშლილობა აქვს და ამიტომ სამკურნალო ცენტრში გადაიყვანეს. ფსიქიკურად გაუწონასწორებლებად გამოცხადება ერთ-ერთი მეთოდია, რითაც ირანის "მორალის პოლიცია" იმ ქალებს ებრძვის, რომლებიც ჩაცმულობისა და ქცევის მკაცრ წესებს არ ემორჩილებიან.

იხილეთ ასევე:

როცა მჩაგვრელი რეჟიმის წინაშე შიშვლდები — აჰუ დერიაის ისტორია