Gen Z-ის განსაკუთრებულ ხასიათზე დიდი ხანია, რაც ქართველი საზოგადოება ალაპარაკდა — გასულ წელს, მარტში დაწყებული აქციების დროს მთავარი მამოძრავებელი ძალა სწორედ ეს თაობა გახდა და გასაკვირი არაა, რომ წელს, იმავე პრობლემის წინაშე აღმოჩენილები უფრო დიდი შემართებით იბრძვიან თავიანთი ქვეყნის თავისუფლებისთვის. Palitra L-ის ერთ-ერთი წარმატებული სერია, Liberteens სწორედ ამ თაობისგანაა შემდგარი.

ლიბერთინსელები ლიტერატურას უცხო ენაზე კითხულობენ და ცდილობენ, ისეთი წიგნები აარჩიონ, რომლებიც მათი თანატოლებისთვის საინტერესო იქნება — რუტა სეპეტისის უნდა გიღალატო სწორედ მათი შერჩეული წიგნია, რომელიც ლიბერთინსის სერიის ფარგლებში გამოიცა და რომელიც ახალი თაობის ფასეულობების ანარეკლია.

რუტა სეპეტისის წიგნში აღწერილია 1989 წელი, ის პერიოდი, როცა მთელ ევროპაში ერთიმეორის მიყოლებით ემხობოდა კომუნისტური რეჟიმები, მაგრამ კვლავ მყარად იდგა რუმინეთის სისხლიანი დიქტატორის, ნიკოლაე ჩაუშესკუს რეჟიმი. უნდა გიღალატო აღწერს ქვეყანაში მკაცრ კონტროლს, საყოველთაო თვალთვალსა და შიმშილს.

ფოტო: Palitra L

ლიბერთინსის ახალი წიგნის მთავარ როლში 17 წლის მოსწავლე, კრისტიან ფლორესკუა, რომელსაც ყველაზე მეტად თავისუფლება სურს, მაგრამ დიქტატორის სპეცსამსახურის, სეკურიტატეს მარწუხებში მოქცეული ვერაფერს ბედავს. ამ პერიოდის რუმინეთში ხომ აკრძალული იყო ყოველივე ადამიანური, სულ მცირე გადაცდომისთვისაც კი ადამიანს ციხეში აგდებდნენ, აწამებდნენ და კლავდნენ.

17 წლის ბიჭმა კი ზუსტად იცის, რომ მისი გაჩანაგებული ქვეყნის საზღვრებს გარეთ თავისუფალი სამყაროა. მის წინაშე კი არჩევანია — იყოს სეკურიტატეს იძულებითი ინფორმატორი ან შეებრძოლოს რეჟიმს.

სეპეტისი დიქტატურის პირობებში ცხოვრების ნათელ სურათს აღწერს, სადაც შიში ყველგან არის და ნდობა კი - ფუფუნებაა. კრისტიანის ისტორია არის იმის შეხსენება, თუ რა ფასი აქვს თავისუფლებას.

უნდა გიღალატო წინააღმდეგობის, გამძლეობისა და თავისუფლებისთვის ბრძოლის თემებით ქართველი ახალგაზრდების გამოცდილებებსა და მისწრაფებებს ეხმიანება. Gen Z ის თაობაა, რომელიც თავისუფალ და დამოუკიდებელ საქართველოში გაიზარდა, ამიტომ ისინი მზად არიან, თავიანთი ერის სუვერენიტეტი და დემოკრატიული ღირებულებები ბოლომდე დაიცვან.

უნდა გიღალატო ახალგაზრდებს ისტორიულ კონტექსტს აცნობს, სთავაზობს ახალ პერსპექტივებს და შთააგონებენ მკითხველს დაფიქრდნენ საკუთარ ცხოვრებასა და საზოგადოებებზე. ქართველი თინეიჯერებისთვის, კრისტიანის დაუმორჩილებლობის შესახებ კითხვა რეპრესიული რეჟიმის წინააღმდეგ აძლიერებს მათ გადაწყვეტილებას, არასოდეს დაუშვან ისტორიის გამეორება.

რუტა სეპეტისის წიგნი არის შეხსენება იმისა, თუ რა შეიძლება დავკარგოთ და, შესაბამისად, რა უნდა დავიცვათ ნებისმიერ ფასად.