ალბათ, ყველა ადვოკატის მთავარი მიზანია, სასამართლო თავისი კლიენტის სიმართლეში დაარწმუნოს. მიუხედავად ამისა, თურმე არიან იურისტები, რომელთაც გამამართლებელი განაჩენი მოისმინეს, ახლა კი ამას მწარედ ნანობენ.

Reddit-ზე ადვოკატებმა ის შემთხვევები გაიხსენეს, როცა საქმის მოგება არ გახარებიათ:

1. "სურდა ბავშვებზე მეურვეობის უფლება ცოლისთვის ავეჯზე გაეცვალა"

"განქორწინების საქმეზე ვმუშაობდი. ქმრის მხარეს წარმოვადგენდი, რომელსაც სურდა ბავშვებზე მეურვეობის უფლება ცოლისთვის ავეჯზე გაეცვალა, წარმოგიდგენიათ? ძვირფასი ავეჯიც კი არ ყოფილა. ამ საქმის გახსენება დღემდე ცუდად მხდის. ამ მოგების შემდეგ საოჯახო სამართალს თავი დავანებე".

2. "ნარკოტიკისთვის თანხის მისაღებად მოიტყუა, თითქოს, მის შვილს კიბო ჰქონდა"

"ჩემმა კლიენტმა ჰეროინზე დამოკიდებულების გამო შვილზე მეურვეობა დაკარგა და ციხეში აღმოჩნდა. სასჯელის მოხდის შემდეგ კი მომმართა და მითხრა, რომ ნარკოდამოკიდებული აღარ იყო, ცხოვრების ახლიდან დაწყება და შვილზე მეურვეობის დაბრუნება უნდოდა. მისი ყოფილი ცოლის მხარე იმისთვის იბრძოდა, რომ კაცს მხოლოდ მეთვალყურეობის ქვეშ, მცირე დროით შესძლებოდა შვილთან კონტაქტი, მე კი კლიენტს ნაწილობრივი მეურვეობა მოვუპოვე. თუმცა, დაახლოებით 3 თვეში კაცი ჰეროინს მიუბრუნდა და ნარკოტიკის ფულისთვის ავეჯის გაყიდვა დაიწყო. ჩემთვის ყველაზე გულსატკენი მაინც ის ფაქტი იყო, რომ დამატებითი თანხის მისაღებად მოიტყუა, თითქოს, მის შვილს კიბო ჰქონდა. ცხადია, მკურნალობისთვის გამოყოფილ ფულს რაშიც დახარჯავდა. ფაქტობრივად, ამ საქმის მოგების შედეგი ის იყო, რომ საწყალ ბავშვს მოუწია ენახა, როგორ მოიხმარდა მამამისი ნარკოტიკს და როგორ იყენებდა მას ფულის საშოვნელად".

3."ძაღლის მეურვეობისთვის იბრძოდა, შემდეგ კი ცხოველთა თავშესაფარში ჩააბარა"

"განქორწინების შემთხვევა მქონდა, როდესაც ქმარი ძაღლის მეურვეობისთვის იბრძოდა, მე კი მის ინტერესებს ვიცავდი. საქმე მოვიგეთ, დაახლოებით ერთ თვეში კი გავიგე, რომ ის ცხოველთა თავშესაფარში ჩააბარა. როგორი საშინელი ადამიანი უნდა იყო, ეს რომ გააკეთო. კიდევ კარგი, ვიღაცამ ეს ამბავი ანონიმურად ყოფილ ცოლს შეატყობინა, რომელმაც ძაღლი იქიდან წამოიყვანა".

4. "სასამართლოდან ცოტა ხანში თავისი 8 წლის შვილი გააუპატიურა"

"სისხლის სამართლის საქმეებზე მუშაობისას ერთი კლიენტი მყავდა, რომელსაც პოლიცია ბარიდან გაჰყვა, მოძრაობის წესების დარღვევაში დაადანაშაულა და დააკავა. კაცს წინა ნასამართლობები უკვე ჰქონდა, ამიტომ ამ საქმის წაგება ძალიან ბევრ პრობლემას შეუქმნიდა. სასამართლოზე დავამტკიცე, რომ სანამ პოლიცია მიჰყვებოდა, არც ერთი წესი არ დაურღვევია — არც სიჩქარისთვის გადაუჭარბებია, არც წითელ შუქნიშანზე გაუვლია, მსგავსი არაფერი, ამიტომ მოსამართლემ გამამართლებელი განაჩენი გამოიტანა. მისი ოჯახი ძალიან მადლიერი იყო, მეც, რა თქმა უნდა, გახარებული ვიყავი. რამდენიმე თვის შემდეგ კი გავიგე, რომ სასამართლოდან ცოტა ხანში მან თავისი 8 წლის შვილი გააუპატიურა. ამ საქმეზე ძალიან ხშირად ვფიქრობ".

5. "ზიანის ანაზღაურებაში მიღებული თანხით ნარკოტიკები იყიდა და ზედოზირებით გარდაიცვალა"

"ზიანის ანაზღაურების საქმე მოვიგე. ჩემმა კლიენტმა $5,000 მიიღო. ამ დროს ციხეში იჯდა, ამიტომ მთხოვა, რომ მისი ფული შემენახა. რამდენიმე თვის შემდეგ, როდესაც ციხიდან გამოვიდა, მაშინვე ჩემთან მოვიდა და ფული გამომართვა. შემდეგ დღეს პოლიციელებმა მომაკითხეს — ამ ადამიანს თუ იცნობო, მკითხეს. ვუთხარი, კი-მეთქი. წინა ღამით ზედოზირებით გარდაცვლილა. თან მხოლოდ ნარკოტიკები, ნემსი და ჩემი საკრედიტო ბარათი ჰქონდა, რომელიც ფულის გამოსატანად მივეცი".