ეკონომიკის მინისტრის, ნათია თურნავას განცხადებით, რებრედინგის ფარგლებში, საპარტნიორო ფონდს საქართველოს განვითარების ფონდი დაერქმევა. თურნავას თქმით, დღესდღეობით ჩამოყალიბებულია კანონპროექტი, რომელიც სულ მალე მთავრობას წარედგინება და შემდეგ უკვე პარლამენტს დასამტკიცებლად. კანონპროექტის მიხედვით კი, პირველ რიგში, საპარტნიორო ფონდის რებრედინგი მოხდება.

"მას საქართველოს განვითარების ფონდი დაერქმევა. ეს მნიშვნელოვანი ნაბიჯი არის, მაგრამ მთლიანად არ ასახავს იმ სიახლეს, რასაც ვგეგმავთ საპარტნიორო ფონდთან მიმართებაში. საპარტნიორო ფონდი, როგორც ინსტრუმენტი მნიშვნელოვან როლს ასრულებს იმ თვალსაზრისით, რომ ბიზნეს საქართველოში სხვადასხვა დივერსიფიცირებული მექანიზმები სჭირდება და მათ შორის, კაპიტალი, რომლის წყაროსაც წარმოადგენდა დღემდე საპარტნიორო ფონდი, თუმცა თანამედროვე სტრუქტურა უნდა იყოს შექმნილი", — განაცხადა თურნავამ.

მისივე თქმით, საუბარია იმაზე, რომ შეიცვლება მენეჯმენტ სტრუქტურები, იარსებებს დამოუკიდებელი, პროფესიული ნიშნით შერჩეული სამეთვალყურეო საბჭო. ამასთან, მან აღნიშნა, რომ სამეთვალყურეო საბჭოში დღემდე მთავრობის წევრები მონაწილეოდნენ, რასაც ანაქრონიზმად აფასებს.

თურნავამ, ასევე, დასძინა, რომ საპარტნიორო ფონდის მენეჯმენტს საპარტნიორო ფონდის ფინანსური აუდიტისა და რესტრუქტურიზაციის გეგმის მომზადება დაევალება.