მიხეილ სააკაშვილის მამა, ნიკოლოზ სააკაშვილი იუსტიციის მინისტრის მამას, გრიგოლ ბრეგაძეს ღია წერილით მიმართავს. სააკაშვილი წერს, რომ როგორც ექიმები ისინი არასდროს ასხვავებდნენ პატიენტებს შეხედულებების მიხედვით და გვერდში დგომას სთხოვს.

"გრიგოლ, გწერ როგორც კოლეგა კოლეგას, როგორც მშობელი მშობელს. ჩვენ მრავალი წელი ვმუშაობდით ერთად, ვემსახურებოდით ყველაზე ჰუმანურ იდეას — სიცოცხლის გადარჩენას.

ჩვენ არასდროს ვარჩევდით პაციენტს მისი შეხედულებების ან რაიმე მიმდევრობის მიხედვით. ჩვენთვის პაციენტი ყოველთვის იყო პაციენტი, იმის და მიუხედავად, ის პატიმარი იყო თუ არა", — წერს ის.

ნიკოლოზ სააკაშვილი მისი და ბრეგაძის ურთიერთობის დეტალებს იხსენებს და აღნიშნავს, რომ როგორც კოლეგა, საჭიროების შემთხვევაში მას გვერდით დაუდგებოდა და პოზიციას უშიშრად გამოხატავდა.

"გრიგოლ, კარგად მახსოვს შენი სიხარული და სიამაყე, როდესაც შენი შვილი პრეზიდენტის სტიპენდიით გაემგზავრა გერმანიაში განათლების მისაღებად. იმ პრეზიდენტის, რომელსაც დღეს იუსტიციის სამინისტრო ართმევს სიცოცხლის უფლებას და არ გადაყავს სამოქალაქო კლინიკაში. არასდროს დამავიწყდება შენი აღტკინებული, ემოციური საუბარი ჩემთან, რასაც მე სიხარულით შევხვდი.

გრიგოლ, ღმერთმა დაგიფაროს ნამდვილად არ გისურვებ შენ მოხვდე ჩემ მდგომარეობაში. მე დაგიდგებოდი გვერდში, როგორც კოლეგა და ექიმი და უშიშრად გამოვხატავდი ჩემს პოზიციას!" — წერს ის.

მიხეილ სააკაშვილი 42-ე დღეა შიმშილობს. 11 ნოემბერს მან განაცხადა, რომ როგორც კი სათანადო დაწესებულებაში გადაიყვანენ, შიმშილობას შეწყვეტს. პასუხად იუსტიციის მინისტრმა თქვა, რომ მოხარული იქნებიან თუ სააკაშვილი შეწყვეტს შიმშილობას, ოღონდ ყოველგვარი დათქმების გარეშე.