პარტია ხალხისთვის ლიდერის ანა დოლიძის აზრით, ქვეყანა "ნინიას ბაღს" დაემსგავსა. ის სვამს კითხვას, აკონტროლებს თუ არა ვინმე ქვეყნის საზღვრებს იმის ფონზე, რომ მუხთარლი გაიტაცეს, ესებუა გაიქცა და სააკაშვილი ამბობს, რომ საქართველოშია.

"ეს ნინიას ბაღია, თუ ქვეყანაა მართლა ბოლო-ბოლო. აფგან მუხთარლი გაქრა, თბილისის ცენტრიდან ადგა, გაქრა და მეორე დღეს აღმოჩნდა ბაქოში; ბადრი ესებუა ადგა, გაქრა, აღმოჩნდა სადღაც; მიხეილ სააკაშვილი ადგა, იქიდან აქ აღმოჩნდა, და თურმე ახლა ჩვენ, საქართველოს მოქალაქეებმა უნდა ვაწარმოოთ გამოძიება, სამი მილიონ ნახევარი ადამიანი უნდა დავკავდეთ ამ საქმით? სად ბრძანდება შინაგან საქმეთა მინისტრი, სუფთა პოლიტიკური ელფერის გარეშე, ხვდებით? [...] ვინმე აკონტროლებს თუ არა ამ ქვეყნის საზღვრებს, ეს კითხვები უნდა დავსვათ", — განაცხადა დოლიძემ ფორმულას ეთერში.

დღეს, პირველ ოქტომბერს მიხეილ სააკაშვილმა Facebook-ზე პოსტი გამოაქვეყნა რომელმაც შექმნა ვარაუდი, რომ შესაძლოა, ის უკვე საქართველოშია. ამასთან, მან გაავრცელა ორი ვიდეოც, სადაც ამბობს, რომ ბათუმშია, ფონად კი ქალაქის ხედი ჩანს.

შინაგან საქმეთა სამინისტროში ამბობენ, რომ ექსპრეზიდენტს ქვეყნის საზღვარი არ გადმოუკვეთავს. ქართული ოცნების თავმჯდომარე ირაკლი კობახიძე კი ამტკიცებს, რომ სააკაშვილი საქართველოში არ არის, მისი ვიდეოები ფეიკია და იმაზე უფრო მარტივი ტექნოლოგიითაა გაკეთებული, ვიდრე DeepFake. მის პასუხად სააკაშვილის თანაგუნდელები ამბობენ, რომ ის ნამდვილად ჩამოვიდა,

აღსანიშნია ისიც, რომ 27 სექტემბერს სააკაშვილმა სოციალურ ქსელში გამოაქვეყნა კიევი-თბილისის თვითმფრინავის ბილეთი, რომლის მიხედვითაც 2 ოქტომბერს, დედასთან, გიული ალასანიასთან ერთად უნდა ჩამოფრენილიყო.

ამავე თემაზე: