გავლენიანმა უფლებადაცვითმა ორგანიზაციამ, Human Rights Watch-მა რუსთავი 2-ის საქმესთან დაკავშირებით სპეციალურ განცხადება გაავრცელა, სადაც წერს, რომ მედიის თავისუფლება საქართველოში რისკის ქვეშაა.

"ყველაზე პოპულარული ტელეარხის, რუსთავი 2-ის მფლობელობის საკითხის სასამართლო განხილვამ წარმოშვა სერიოზული წუხილი მთავრობის მიერ მედიასა და სასამართლო სისტემაში პოტენციური ჩარევის შესახებ", - წერს HRW.

ორგანიზაციისს წარმომადგენელი სამხრეთ კავკასიაში, გიორგი გოგია აცხადებს, რომ ხელისუფლებისთვის სასურველმა ცვლილებამ არხის სარედაქციო პოლიტიკაში, შესაძლოა, სერიოზულად დააზიანოს მედიაპლურალიზმი საქართველოში და მნიშვნელოვნად შეზღუდოს საზოგადოების წვდომა ოპოზიციურ აზრზე.

"რუსთავი 2-ის მფლობელობის დავასთან დაკავშირებული მთლიანი პროცესი საფრთხეს უქმნის მედიის თავისუფლებასა და სასამართლო სისტემის დამოუკიდებლობას, რაც საჭიროებს კრიტიკულად განხილვას" - აცხადებს HRW.

Human Rights Watch თავის განცხადებაში დეტალურად მიმოიხილავს რუსთავი 2-ის გარშემო განვითარებულ მოვლენებს.