ოზურგეთში ორი პირი კიბერდანაშაულის ბრალდებით დააკავეს. შინაგან საქმეთა სამინისტროს ცნობით, დაკავებულების საცხოვრებელი სახლის ჩხრეკისას პოლიციამ კომპიუტერული ტექნიკა, მობილური ტელეფონები, საბანკო პლასტიკური ბარათები და სიმბარათები ნივთმტკიცების სახით ამოიღო.

"28 აპრილს და 6 ივნისს, პირმა მის მიერ კუსტარულად აწყობილი სწრაფი ჩარიცხვის აპარატის გამოყენებით მოახერხა ქალაქ სენაკსა და ქალაქ ზესტაფონში მდებარე სწრაფი ჩარიცხვის აპარატების პროგრამული უზრუნველყოფის გასაღების, ე.წ. "დონგლის" კოდის გაწერა. კუსტარული სწრაფი ჩარიცხვის აპარატის გამოყენებით ონლაინ ტოტალიზატორის, მის მიერვე შექმნილ, არავერიფიცირებულ და ერთ-ერთი მომხმარებლის ვერიფიცირებულ ანგარიშებზე თაღლითური გზით გადარიცხა 7000 ლარი. აღნიშნული თანხის ნაწილი — 2000 ლარი წინასწარი შეთანხმებით, ამავე ონლაინ ტოტალიზატორის მომხმარებელ მეორე პირთან ერთად გაანაღდა. მეორე ნაწილი კი — 5000 ლარი ქობულეთში მდებარე ერთ-ერთი ბანკომატიდან თავად გამოიტანა", — ნათქვამია შინაგან საქმეთა სამინისტროს განცხადებაში.

საქმეზე გამოძიება მიმდინარეობს საქართველოს სისხლის სამართლის კოდექსის 284-ე მუხლის მეორე ნაწილის "ბ" ქვეპუნქტით, 286-ე მუხლის მესამე ნაწილის "ბ" ქვეპუნქტით, 180-ე მუხლის მეორე ნაწილის "ა" და "ბ" ქვეპუნქტით და ამავე მუხლის მესამე ნაწილის "ა" ქვეპუნქტით.