ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ. ასევე, ევროკავშირს მოუწოდეს, რომ ლუკაშენკოს ეკონომიკური სანქციები დაეკისროს. ამის შესახებ ინფორმაცია გამოცემა REUTERS-მა გაავრცელა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა.

"ევროკავშირს ბელარუსის მიმართ ახალი მიდგომა სჭირდება, რომელიც ლუკაშენკოს რეჟიმთან ნებისმიერი თანამშრომლობის შეწყვეტას გულისხმობს", — განაცხადა ლიეტუველმა ევროპარლამენტარმა, პეტრას აუსტრევიჩიუსმა.

მოსკოვის მხარდაჭერა ლუკაშენკოსთვის გადამწყვეტი გახდა, რომ დარჩენილიყო ბელარუსის პრეზიდენტად. ამავე დროს, კრემლი დასავლეთს ბელარუსში რევოლუციის მოწყობაში ადანაშაულებს.

ლუკაშენკოს გადადგომის მოთხოვნით აქციები 9 აგვისტოს დაიწყო. აქციები საპრეზიდენტო არჩვენების შედეგებს მოჰყვა, რომლის თანახმადაც, ალექსანდრე ლუკაშენკომ ხმების 80 პროცენტი მიიღო, ხოლო მისმა ოპონენტმა, სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ათასობით ადამიანი კი პოლიციამ დააკავა. საპროტესტო აქციების დროს სამი ადამიანი გარდაიცვალა.

ამავე თემაზე: