ქართული სოფლები აგვისტოს ომამდე და ომის შემდეგ — ახალ ვებ-გვერდზე შესაძლებელი იქნება ნასას სატელიტური ფოტოების დათვალიერება ე.წ. ფარდის ეფექტით.

საიტის პრეზენტაცია საერთაშორისო გამჭვირვალობა — საქართველომ დღეს, 7 აგვისტოს, ოკუპაციის მუზეუმში გამართა, სადაც ასევე ცნობილი გახდა, რომ ჯამში 19 სოფლის ფოტოების ნახვა იქნება შესაძლებელი. მათ შორის: თამარაშენი, ქვემო და ზემო აჩაბეთი, კეხვი, ქემერტი, ვანათი, ავნევი, ქსუისი, ძარწემი, ბერულა და სხვა.

ამავე ვებ-გვერდზე შესაძლებელია რუსული სამხედრო ბაზების ნახვაც, რომლებიც მოსახლეობისგან დაცლილ და დანგრეულ სოფლებში აშენდა. დათვლილია თითოეულ ოკუპირებულ სოფელში მდებარე რუსული ბაზების ფართობი და ზუსტი კოორდინატები.

ფოტო: russianoccupation.ge

Russianoccupation.ge-ზე ასევე განთავსებულია იმ ადამიანების სახელი და გვარები, რომლებიც ამ სოფლებში ცხოვრობდნენ და მათი სახლები ომის დროს დაინგრა, რომლებიც საკუთარ ქვეყანაში დევნილებად იქცნენ. ჯამში ასახულია დაახლოებით 16 ათასამდე დევნილი მოქალაქის მონაცემი და საიტზე ისინი საკუთარ სახლებთან არიან დაკავშირებულნი.

დღეს აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.