გირჩის ლიდერმა ზურაბ ჯაფარიძემ შინაგან საქმეთა სამინისტროში შმAXI-ის ახალი ლოგო მიიტანა. როგორც ჯაფარიძე ამბობს, ის შინაგან საქმეთა მინისტრისგან ახალი ლოგოს დადასტურებას ან სამინისტროსგან თავიანთი ვერსიის შეთავაზებას ითხოვენ.

"ჩვენ შევქმენით ახალი ლოგო. შინაგან საქმეთა სამინისტროს ვთავაზობთ არის ის, რომ დაგვიდასტურონ ასეთი ლოგოს გამოყენების შემთხვევაში შმAXIისტებს აღარ დააჯარიმებენ. თუ იტყვიან, რომ ეს ლოგოც მიუღებელია მაშინ სხვა ვერსიებსაც ვთავაზობთ. კიდევ გვაქვს რამდენიმე ვერსია. თუ ამ ლოგოებიდანაც ვერაფერს ვერ ამოარჩევენ, შინაგან საქმეთა სამინისტროს ვთავაზობთ, რომ თვითონ დახატონ ან მოიფიქრონ ნებისმიერი რამ. რაც არ უნდა მოიფიქრონ, იმას დავაყენებთ მანქანაზე და ავანთებთ", — განაცხადა ჯაფარიძემ.

თბილისის საკრებულოს დადგენილებით, ტაქსით გადაყვანის ნებართვის შესახებ მუხლის მიხედვით, მძღოლებს ტაქსის ნიშანთან მიმსგავსებული ტრაფარეტის გამოყენება ეკრძალებათ.

შმAXI-ის შესახებ

კომპანია შმAXI გირჩმა თბილისში ტაქსის რეგულაციების ამოქმედების გასაპროტესტებლად დააფუძნა. პარტიაში აცხადებენ, რომ კომპანია უნივერსიტეტია და მოქალაქის ერთი ადგილიდან მეორე ადგილზე გადაყვანის დროს საგანმანათლებლო საქმიანობას ეწევა. რეალურად შმAXI არის გზა, რომლის საშუალებითაც ტაქსის რეგულაციის თავის არიდებაა შესაძლებელი და მძღოლებს ნებისმიერი ფერის მანქანით მგზავრის გადაყვანა შეუძლიათ.