თეთრი სახლი პრეზიდენტ დონალდ ტრამპის საიმპიჩმენტო გამოძიებაში კონგრესთან თანამშრომლობას არ აპირებს. როგორც თეთრი სახლის იურისტის წერილშია განმარტებული, ხალხისა და კონსტიტუციის წინაშე ვალდებულებების შესრულებისთვის, დონალდ ტრამპს არ შეუძლია "ერთპარტიულ, არაკონსტიტუციურ გამოძიებაში მიიღოს მონაწილეობა".

კონგრესის წარმომადგენლობითი პალატის სპიკერი, ნენსი პელოსი ამბობს, რომ თანამშრომლობაზე თეთრი სახლის უარის გამო დონალდ ტრამპი იქნება პასუხისმგებელი.

სატელეფონო საუბრის სკანდალი

დონალდ ტრამპისა და უკრაინის პრეზიდენტის, ვოლოდიმირ ზელენსკის სატალეფონო საუბრის გარშემო არსებული სკანდალის გამო კონგრესში ტრამპის იმპიჩმენტის პროცედურა დაიწყო. დემოკრატები, რომლებიც ქვედა პალატას აკონტროლებენ, დონალდ ტრამპს თანამდებობის ბოროტად გამოყენებაში ადანაშაულებენ.

თვითონ ტრამპი ყველა ბრალდებას უარყოფს. იმპიჩმენტის პროცედურის დაწყებას კი მან სახელმწიფო გადატრიალება უწოდა.

ტრამპმსა და ზელენსკის სატელეფონო საუბარი ივლისში შედგა, თუმცა მისი დეტალური შინაარსი მხოლოდ სექტემბერში გახდა ცნობილი. გარდა ამისა, გავრცელდა ინფორმაცია, რომ ზელენსკისთან საუბრამდე ერთი კვირით ადრე ტრამპმა პირადად გასცა ბრძანება, რომ უკრაინისთვის სამხედრო დახმარება შეეჩერებინათ.

აშშ-ს პრეზიდენტმა დახმარების შეჩერება აღიარა და გადაწყვეტილება დაასაბუთა იმით, რომ ევროპის სხვა ქვეყნები, როგორიცაა გერმანია და საფრანგეთი, უკრაინას არასათანადოდ ეხმარებიან. სექტემბრის შუა რიცხვებში კი 400 მილიონი დოლარის დახმარება უკრაინამ, საბოლოოდ, მიიღო.

ყოფილი ვიცე-პრეზიდენტი ჯო ბაიდენი 2020 წლის საპრეზიდენტო არჩევნებში დონალდ ტრამპის მთავარ კონკურენტად განიხილება. მისი შვილი ჰანტერ ბაიდენი 2014-2019 წლებში კომპანია ბურისმაში დირექტორთა საბჭოს წევრი იყო. ყოფილმა გენპროკურორმა ვიქტორ შოკინმა კომპანიის მფლობელის, ნიკოლაი ზლოჩევსკის წინააღმდეგ სისხლისსამართლებრივი დევნა დაიწყო. უკრაინის ხელისუფლებამ ბურისმას საქმე 2017 წელს დაასრულა და ვერანაირი დარღვევა ვერ გამოავლინა.

შოკინის საქმიანობით დასავლეთში არაერთი ლიდერი იყო უკმაყოფილო, რადგან ამბობდნენ, რომ ის კორუფციას არასათანადოდ იძიებდა. 2015 წლის დეკემბერში კიევში ვიზიტისას ჯო ბაიდენმა შოკინის გათავისუფლებაც მოითხოვა. საბოლოოდ, გენპროკურორი თანამდებობიდან 2016 წელს გადააყენეს.

გაიგეთ მეტი: