ახლადარჩეული პრემიერ-მინისტრი გიორგი გახარია დღეს მთავრობის პირველ სხდომას მართავს. დაწყებამდე მან მედიასა და საზოგადოებას მისი გუნდის მუშაობის ფორმატი გააცნო.

გახარიას თქმით, მთავრობის სხდომები ხუთშაბათობით, დილის ათ საათზე გაიმართება. მისივე თქმით, ყოველი სხდომის შემდეგ მინისტრები მედიასთან ჩავლენ და არამხოლოდ სხდომაზე განხილულ საკითხებზე ისაუბრებენ, არამედ საზოგადოებისთვის საინტერესო სხვა კითხვებსაც უპასუხებენ.

მედიისა და მინისტრების ურთიერთობის ეს ფორმატი აქამდეც გამოიყენებოდა, თუმცა უცნობია უპასუხებს თუ არა კითხვებს თავად პრემიერი. ამ ეტაპზე უცნობის ისიც, შეინარჩუნებს თუ არა გახარია მამუკა ბახტაძის შემოღებულ ბრიფინგებს სხდომის წინ.

მან ისაუბრა ძირითად პრინციპებზეც, რომლითასც მისმა გუნდმა უნდა იხელმძღვანელოს. ესენია:

  1. საქმის დროული კეთება;
  2. საქმის ეფექტიანი კეთება;
  3. კეთილსინდისიერება;
  4. დისციპლინა;
  5. ღიაობა.

"რა თქმა უნდა, ჩვენ მაქსიმალური კომუნიკაცია უნდა ავაწყოთ ჩვენს მოქალაქეებთან, სამოქალაქო სექტორთან, ბიზნესთან. ჩვენ ყველამ ერთად უნდა ვიზრუნოთ პირველ რიგში ჩვენს ახალგაზრდებზე, ჩვენს ბავშვებზე და ჩვენს ღვაწლმოსილ მოხუცებზე" — განაცხადა მან.

პრემიერ-მინისტრი მამუკა ბახტაძე 2 სექტემბერს გადადგა. გადადგომის შესახებ მან Facebook-ზე დაპოსტა და სათქმელი 3 947 სიტყვაში ჩაატია. შინაგან საქმეთა მინისტრი გახარია, რომლის გადადგომასაც საზოგადოების ნაწილი სამ თვეზე მეტი ითხოვდა, მმართველმა პარტიამ 3 სექტემბერს დააწინაურა და პრემიერ-მინისტრობის კანდიდატად წარადგინა.

მთავრობის დამტკიცების პროცედურა ერთი კვირის განმავლობაში პროტესტისა და აქციების ფონზე მიმდინარეობდა. როგორც #სირცხვილიას აქტივისტები, ისე ნაციონალური მოძრაობისა და ევროპული საქართველოს მხარდამჭერები და წევრები სასტვენებითა და შეძახილებით პრემიერმინისტრის პოსტზე გახარიას კანდიდატურას აპროტესტებდნენ. კენჭისყრის პარალელურად პარლამენტთან #სირცხვილიას წევრებმა ცხვრები მოიყვანეს, ქართული ოცნების დეპუტატების სიმბოლოდ.

გახარიასა და მისი მთავრობის მოსმენა ყველაზე მწვავე ოპოზიციის ფორმატში იყო. ნაციონალურმა მოძრაობამ მას სიმღერა "გახარიას უხარია" მოასმენინა, შემდეგ პასუხებს არ მოუსმინა და სხდომა დაამთავრა. ევროპულმა საქართველოს კითხვების სტრატეგია აირჩია. მთავარი თემა 20-21 ივნისის აქცია იყო. კანდიდატის პასუხები არც მათ მოისმინეს და სხდომა დახურეს. ოპოზიციის პასუხად გახარიამ თქვა, რომ "მათ დაასრულებს". ქართული ოცნება გახარიას მთავრობის პროგრამაში პოზიტივზე ამახვილებენ ყურადღებას და ნეგატივს ოპონენტებს აბრალებენ.

ამავე თემაზე: