"არამგონია, რომ დონალდ ტრამპი იდეოლოგიურად ჰგავდეს ვოლდემორს, მგონია რომ ის უპრინციპოა და ნამდვილად არ ვიცი მას ჭეშმარიტად სჯერა თუ არა იმის რასაც ამბობს", ასე უპასუხა დენიელ რედკლიფმა ჟურნალისტების კითხვას როულინგის მიერ ტრამპისა და ვოლდემორის შედარების შესახებ.

ჯოან როულინგმა საკუთარ ტვიტერზე დონალდ ტრამპის შესახებ დაწერა: "რა საშინელებაა, ვოლდემორიც კი არ ყოფილა ასეთი ცუდი".

სოციალურ ქსელებში დაიწყო კამპანია #voldetrump. მომხმარებელთა აზრით რესპუბლიკელების პრეზიდენტობის კანდიდატი, დონალდ ტრამპი ისეთივე აგრესიულია კონკრეტული ჯგუფების მიმართ, როგორი მაგლთმოძულეც ბნელი ჯადოქარი. ამ ამბავს დიდი გამოხმაურება მოყვა, რისი მიზეზიც კვლევაა, რომლის თანახმადაც პოტერჰედებს შანსი აქვთ ტრამპს გამარჯვებაში ხელი შეუშალონ.

კვლევა პენსილვანიის შტატის უნივერსიტეტის საზოგადოებრივი აზრისა და პოლიტიკური ფსიქოლოგის კვლევის პროფესორმა დიანა მუცმა ჩაატარა. მუცის აზრით, ნაწარმოების იდეის გაგება მკითხველს უფრო ტოლერანტულს ხდის. მას მიაჩნია, რომ როულინგი ლიბერალურ ღირებულებებს ამკვიდრებს და მკითხველი ავტორიტარული იდეების მოწინააღმდეგე ხდება, პლუს ყოველი რომანი ზრდის წინააღმდეგობას ისეთი პოლიტიკური საკითხების მიმართ, როგორიცაა სიკვდილის დასჯა და წამება. საერთო ჯამში, ჰარი პოტერის მკითხველი ტრამპის იდეოლოგიის მიმართ კრიტიკული ხდება.