საქართველოს მთავრობამ 2019-2022 წლების საქართველოს საგარეო პოლიტიკის სტრატეგია დაამტკიცა. პრემიერ-მინისტრმა მამუკა ბახტაძემ დოკუმენტს ხელი 28 მარტის მთავრობის სხდომაზე მოაწერა. ამერიკის შეერთებულ შტატებთან თანამშრომლობის გაღრმავება საგარეო პოლიტიკის პრიორიტეტული მიმართულებად გაიწერა. დოკუმენტში ვკითხულობთ, რომ საქართველოსა და აშშ-ს აკავშირებს საერთო ღირებულებები და სტრატეგიული ინტერესები.

სტრატეგიის დოკუმენტში გაიწერა, რომ ქვეყნის საგარეო პოლიტიკის ძირითადი მიზნებია ნატოსა და ევროკავშირში გაწევრება. საუბარია ასევე რუსეთთან ურთიერთობის არსებული ფორმატის შენარჩუნებაზე, თუმცა ნახსენები არ არის ოთხოზორია-ტატუნაშვილის სია, რომელშიც საქართველოს მოქალაქეების წინააღმდეგ ჩადენილი დანაშაულისთვის 33 პირია შესული. აღნიშნული საკითხი დოკუმენტის საკომიტეტო განხილვისას ოპოზიციის კრიტიკის საგანი იყო.

რუსეთთან ურთიერთობა რეგიონული პოლიტიკის ფარგლებში

სტრატეგიის დოკუმენტში წერია, რომ საქართველოს უმთავრესი მიზანია, რუსეთთან ურთიერთობებში, აფხაზეთისა და ცხინვალის რეგიონების დეოკუპაცია. ასევე, ოკუპირებული ტერიტორიების ე.წ. დამოუკიდებლობის აღიარების გაუქმება.

მთავრობის საგარეო სტრატეგიაა რუსეთთან სამშვიდობო მოლაპარაკებები ჟენევის საერთაშორისო დისკუსიების ფარგლებში გაგრძელდეს. ასევე, მთავრობის გეგმით, საქართველო კვლავ გამოიყენებს პრემიერ-მინისტრის სპეციალური წარმომადგენლისა და რუსეთის საგარეო საქმეთა მინისტრის მოადგილის [აბაშიძე-კარასინის] ორმხრივ ფორმატს.

ეროვნულ დოკუმენტში გაწერილია მომდევნო ოთხი წლის განმავლობაში განსახორციელებელი ხუთი სტრატეგიული მიზანი:

სუვერენიტეტი და ტერიტორიული მთლიანობა

დოკუმენტის მიხედვით, საქართველოს უმთავრესი სტრატეგიული მიზანია ქვეყნის სუვერენიტეტის განმტკიცება და ტერიტორიული მთლიანობის მშვიდობიანი გზით აღდგენა. ასევე გაიწერა, რომ საქართველოს საგარეო პოლიტიკის პრიორიტეტი რუსეთ-საქართველოს კონფლიქტის მშვიდობიანი მოგვარებაა. მათ შორის, ოკუპირებული ტერიტორიების ე.წ. დამოუკიდებლობის არაღიარების უზრუნველყოფა, ქვეყნის დეოკუპაციის, იძულებით გადაადგილებულ პირთა და ლტოლვილთა საკუთარ სახლებში დაბრუნების, საოკუპაციო ხაზებით გაყოფილ მოსახლეობას შორის შერიგებისა და ნდობის აღდგენის ხელშეწყობა.

ევროკავშირში გაწევრება

სტრატეგიის დოკუმენტში ერთ-ერთ მიზნად უკვე გაიწერა საქართველოს ევროკავშირში გაწევრება, ნაცვლად ინტეგრაციისა, რაც მანამდე იყო.

"[ევროკავშირში გაწევრება] სრულად ასახავს ქვეყნის მოსახლეობის ურყევ ნებას, გახდეს დემოკრატიული ქვეყნების ხუთი თანამეგობრობის ღირსეული და სრულუფლებიანი წევრი. მნიშვნელოვანი ძალისხმევა მიმართული იქნება საქართველოს ევროკავშირში გაწევრების პერსპექტივის აღიარებისკენ. აქტიურად წარიმართება მუშაობა, როგორც არსებული ფორმატების ეფექტური გამოყენების, ისე ახალი წინადადებებისა და ინიციატივების შეთავაზების კუთხით", — ვკითხულობთ დოკუმენტში.

ჩრდილოატლანტიკურ ორგანიზაციაში (ნატო) გაწევრება

საგარეო პოლიტიკის დოკუმენტში ასევე ჩაიწერა ნატოში გაწევრება, როგორც ქვეყნის უსაფრთხოების, შემდგომი ინსტიტუციური განვითარებისა და კეთილდღეობის უზრუნველყოფის ერთ-ერთი საშუალება.

"საქართველო სრულად იზიარებს პრინციპებსა და ღირებულებებს, რომლის გარშემოც არიან გაერთიანებული ალიანსის წევრი ქვეყნები. ნატო-ს მისიებსა და ოპერაციებში ჩართულობით საქართველო ადასტურებს საკუთარ მზაობას და შესაძლებლობას, ქმედითი წვლილი შეიტანოს საერთო ევროატლანტიკურ უსაფრთხოებაში", — წერია სტრატეგიის დოკუმენტში.

ინსტიტუციური დემოკრატიის კონსოლიდაცია და საზღვარგარეთ ქვეყნის პოზიტიური იმიჯის განმტკიცება

საგარეო პოლიტიკის ერთ-ერთ მიზნად ჩაწერეს ქვეყნის დემოკრატიული მიღწევების შემდგომი კონსოლიდაციის ხელშეწყობა და საზღვარგარეთ საქართველოს იმიჯის განმტკიცება.

მდგრადი ეკონომიკური განვითარება

საგარეო პოლიტიკის სტრატეგიულ მიზნად ჩაიწერა მდგრადი ეკონომიკური განვითარება და ეკონომიკური მდგომარეობის ინსტიტუციური დემოკრატიის მაღალ სტანდარტებთან დაახლოება. ასევე, ინვესტიციებისა და თანამედროვე ტექნოლოგიების/ინოვაციების მოზიდვის ხელშეწყობა, სტრატეგიული ადგილმდებარეობისა და მსოფლიო ეკონომიკაში არსებული ახალი შესაძლებლობების მაქსიმალურად გამოყენება.

დოკუმენტის მოქმედების ვადად განისაზღვრა ოთხი წელი. სტრატეგიასთან ერთად დამტკიცდა ერთწლიანი სამოქმედო გეგმაც, რომელიც მოიცავს 2019 წლის პერიოდს.