საქართველოს ეკონომიკის მინისტრის გიორგი ქობულიას სახლის ქურდობის ბრალდებით ერთი პირი დააკავეს. ამის შესახებ ინფორმაცია შინაგან საქმეთა სამინისტრომ გაავრცელა.

უწყების ცნობით, დაკავებული პირობითი მსჯავრის ქვეშ მყოფი 1990 წელს
დაბადებული პირია. ბრალდება 4-დან 7 წლამდე ვადით თავისუფლების აღკვეთას ითვალისწინებს.

უწყების ცნობით, დაკავებულმა მიმდინარე წლის 16 მარტს დაბა წყნეთში მდებარე, ეკონომიკისა და მდგრადი განვითარების მინისტრის გიორგი ქობულიას აგარაკზე უკანონოდ შეაღწია, საიდანაც სხვადასხვა ნივთი მოიპარა და შემთხვევის ადგილიდან მიიმალა. სამართალდამცველებმა ბრალდებული მომხდარიდან მალევე თბილისში დააკავეს. პოლიციამ ნაქურდალი ნივთების ნაწილი ნივთმტკიცებად ამოიღო.

გამოძიება ქურდობის მუხლით მიმდინარეობს. გუშინ, 27 მარტს შინაგან საქმეთა სამინისტროში On.ge-ს განუცხადეს, რომ მინისტრის სახლის ქურდობის საკითხზე შეტყობინება არ შესულა.