ერთიანი ნაციონალური მოძრაობის წევრი დავით კირკიტაძემ შიმშილობა დაიწყო. დაკავებულის ადვოკატი, გიორგი კონდახაშვილი ამბობს, რომ მისი დაცვის ქვეშ მყოფი ბრალს არ აღიარებს.

ადვოკატის თქმით, კირკიტაძე პოლიციელზე ძალადობას უარყოფს და ამბობს, რომ მის მიმართ პოლიტიკური დევნა მიმდინარეობს. როგორც კონდახაშვილი განმარტავს, სისხლის სამართლის 353-ე მუხლი, რომლითაც დააკავეს კირკიტაძე, სამართლებრივი შინაარსით სამართლებრივად შეუთავსებელია.

"ვინაიდან დავით კირკიტაძის გადმოცემით მათი ძირითადი კონსტიტუციური უფლების განხორციელება და ამ დროს თავდასხმა, თითქოს, და სამართალდამცავ ორგანოს თანამშრომლებზე სამსახურებრივი მდგომარეობიდან გამომდინარე და სამსახურებრივ საქმიანობასთან დაკავშირებით სამართლებრივი თვალსაზრისით, არის ცოტათი შეუთავსებელი", — განაცხადა ადვოკატმა.

17 დეკემბერს პოლიციელზე თავდასხმისთვის, ფიზიკური შეურაცხყოფისა და ქონების დაზიანებისთვის ერთიანი ნაციონალური მოძრაობის წევრი, დავით კირკიტაძე დააკავეს.

დაპირისპირება ველისციხეში

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღვრულ ადგილზე გადაიყვანდნენ.

გაერთიანებული ოპოზიციის პოზიციით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდავს. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.

18 დეკემბრიდან გაერთიანებული ოპოზიცია "უწყვეტ" აქციებს აანონსებს. გრიგოლ ვაშაძის განცხადებით, საქართველოს ხელისუფლებამ მოპარული არჩევნების შემდეგ მოქალაქეების კონსტიტუციური უფლებები შეზღუდა.

ამავე თემაზე: