ინტერპოლის დირექტორი რუსეთის შინაგან საქმეთა სამინისტროს გენერალი, ალექსანდრ პროკოპჩუკი არ იქნება, თუმცა ის ერთ-ერთი ფავორიტი იყო. დუბაიში ორგანიზაციის გენერალური ასამბლეის სესიაზე დირექტორად სამხრეთ კორეის წარმომადგენელი, კიმ ჩონ იანი აირჩიეს.

ინტერპოლის დირექტორის თანამდებობა ვაკანტური მას შემდეგ გახდა, რაც მისი დირექტორი მენ ჰუნვეი დაიკარგა. შემდგომში აღმოჩნდა, რომ ის ჩინეთშია დაკავებული და კორუფციის ბრალდებით მის წინააღმდეგ საქმეა აღძრული, რის გამოც თანამდებობიდან გადადგა.

ინტერპოლის დირექტორად რუსი გენერლის არჩევის საკითხს დიდი გამოხმაურება მოყვა რამდენიმე ქვეყნის მხრიდან. ძირითადად კი ისინი ამბობდნენ, რომ არ შეიძლება ორგანიზაციის ხელმძღვანელი გახდეს იმ ქვეყნის წარმომადგენელი, სადაც ადამიანი უფლებები სისტემატიურად ირღვევა.

აშშ-ს სენატორები ნაწილი საერთო განცხადებით გამოვიდა, რომელშიც აღნიშნული იყო, რომ პროკოპჩუკის არჩევით "მელია საქათმის თავში ჩადგებოდა". CNN-ის ინფორმაციით, რესპუბლიკელი სენატორი, მარკო რუბიო იუსტიციის სამინისტროსა და სახელმწიფო დეპარტამენტის დახმარებით პირდაპირ ლობირებდა ინტერპოლის წევრ ქვეყნებს პროკოპჩუკის წინააღმდეგ.

სახელმწიფო მდივანმა, მაიკ პომპეომ კი განაცხადა, რომ ვაშინგტონი სამხრეთ კორეის წარმომადგენელს უჭერდა მხარს.

პროკოპჩუკის წინააღმდეგ გამოვიდნენ ბრიტანელი მინისტრებიც. მათივე თქმით, რუსი გენერლის დანიშვნა ინტერპოლის სათავეში სოლსბერიში მოწამლულების შეურაცხყოფა იქნებოდა.

ყველაზე მკაცრი პოზიცია დაიკავა ლიეტუვამ. კენჭისყრამდე რამდენიმე საათით ადრე ქვეყნის პარლამენტმა მიიღო რეზოლუცია, რომლის მიხედვითაც პროკოპჩუკის არჩევის შემთხვევაში ლიეტუვა დატოვებდა ინტერპოლს. ორგანიზაციის დატოვებით დაიმუქრა უკრაინის შინაგან საქმეთა მინისტრმა, არსენი ავაკოვმა.