თბილისის პოლიციის დეპარტამენტის დეტექტივების სამმართველოს უფროსი იოსებ სიგუა საგამოძიებო კომისიის 3 ივლისის სხდომას არ ესწრება. კომისიის სხდომაზე არგამოცხადების მიზეზი ჯანმრთელობის პრობლემებია.

საგამოძიებო კომისიის თავმჯდომარის თქმით, სიგუას კითხვებზე პასუხის გაცემა მაინც მოუწევს. კაპანაძის თქმით, კომისიის წევრებისთვის, მისი სხდომაზე არმოსვლის შესახებ ინფორმაცია არავის მიუწოდებია.

"მინდა ყველას მოვუწოდო, რომ აქ მოსასვლელად კარგად მოემზადონ და ნუ ექნებათ იმედი, რომ ან ჯანმრთელობის თუ სხვა რაიმე მიზეზით თავს აარიდებენ იმ კითხვებს, რომელიც კომისიას და ასევე საზოგადოებას აქვს", – განაცხადა კაპანაძემ.

დღეს შინაგან საქმეთა სამინისტროს წარმომადგენლების, გამომძიებელ ირაკლი ფიფიასა და თბილისის პოლიციის დეპარტამენტის უფროსის შალვა ბედოიძის მოსმენა გრძელდება.