NDI-ის მიერ ჩატარებული საზოგადოებრივი კვლევის შეკითხვას, თვლით თუ არა თავს დასაქმებულად, მოსახლეობის 63%-მა უარყოფითად უპასუხა.

კვლევის შედეგების მიხედვით, იმ 36 პროცენტიდან, რომლებიც თავს დასაქმებულად მიიჩნევენ, 55% ქალია და 45% კაცი.

კითხვაზე პასუხის მთავარი განმსაზღვრელია, რესპოდენტის საქმიანობას შემოსავალი ჰქონდეს. იგულისხმება ნახევარი ან სრული განაკვეთის თანამშრომელი, ოფიციალური ან არაოფიციალური თანამშრომელი, თვითდასაქმებული.

56-ს გადაცილებული მოსახლეობის 75% თავს დაუსაქმებლად მიიჩნევს, 18-დან 35 წლამდე მოქალაქეების 33% კი კითხვას დადებითად პასუხობს.

დასაქმებულად თავს ყველაზე მაღალი, 49 პროცენტიანი, მაჩვენებლით 36-55 წლამდე მოქალაქეები მიიჩნევენ.

იმ 63%-დან, რომელიც თავს დაუსაქმებლად მიიჩნევს, მხოლოდ 40% ეძებს სამსახურს.

NDI-ის გამოკითხვა 2016 წლის 8 ივნისიდან 6 ივლისის პერიოდში, საქართველოს მასშტაბით 4 113 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულენოვან, სომხურენოვან და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 2,1%.

კვლევას აფინანსებს შვედეთის საერთაშორისო თანამშრომლობის განვითარების სააგენტო (SIDA) და ატარებს CRRC-საქართველო.