საქართველოს განათლებისა და მეცნიერების მინისტრის, მიხეილ ჩხენკელის განცხადებით, ახალი სასწავლო წლიდან სკოლასა და მშობლებს შორის კონტრაქტები გაფორმდება.

ეს ცვლილება ერთ-ერთი გზაა იმ აქტივობებიდან, რომელიც სკოლაში ბულინგის აღმოფხვრასა და აგრესიის დაწევას ისახავს მიზანს.

მიხეილ ჩხენკელის თქმით, კონტრაქტში ის უფლებები, მოვალეობები და ვალდებულებები გაიწერება, რომელიც თითოეულ მხარეს გააჩნია.

"სკოლის ხელმძღვანელები, მანდატურები და მშობლები უნდა წარმოადგენდნენ ერთ გუნდს, რომლის მიზანიც ბავშვების უსაფრთხო გარემოზე ზრუნვა იქნება", - განაცხადა მიხეილ ჩხენკელმა განათლების სამინისტროს ახალი სამოქმედო გეგმის პრეზენტაციის დროს.

სკოლაში ბულინგის აღმოფხვრის მიზნით, განათლების სამინისტრო კომპლექსურ მუშაობას გეგმავს.

მიხეილ ჩხენკელის თქმით, მანდატურების რეფორმით, გაძლიერდება მანდატურების სამსახური, რომელიც სკოლაში უსაფრთხო გარემოს გარანტორი გახდება.

მინისტრი ფიქრობს, რომ მხოლოდ მანდატურების რეფორმით და ძალისმიერი გზით, პრობლემა ვერ მოგვარდება და ფსიქოლოგების ინსტიტუტის განვითარება ერთ-ერთი გადამწყვეტია.

"ჩვენი მიზანია, ყველა სკოლაში კვალიფიციური ფსიქოლოგები გვყავდეს. იმ სკოლებში, სადაც კვალიფიციური კადრები არ გვყავს, მობილური ჯგუფები მუშაობენ, ასევე გვეხმარებიან ფსიქოლოგიის მიმართულების მაგისტრანტები და დოქტორანტები. ასევე ავამუშავეთ 24-საათიანი ფსიქოლოგიური დახმარების ცხელი ხაზი, რაც გვეხმარება თავი ავარიდოთ ექსესებს", - განაცხადა მიხეილ ჩხენკელმა.

მინისტრმა საინფორმაციო კამპანიის მნიშვნელობაზე ისაუბრა და განაცხადა, რომ სკოლაში ბულინგის პრევენციის მიზნით, საინფორმაციო ფლაერები დარიგდა.

მისივე თქმით, ხორციელდება პროექტი "მოვუსმინოთ ბავშვებს", რომლის ფარგლებშიც განათლების მინისტრი მიდის სკოლებში და ბავშვების პრობლემებს ეცნობა.

"ყველა მოსწავლეს კარგად აქვს გააზრებული თავისი როლი ბულინგის აღმოსაფხვრელად და აგრესიის დასაწევად", - განაცხადა მიხეილ ჩხენკელმა.

ის ფიქრობს, რომ ბულინგის დასაძლევად მნიშვნელოვანია სპორტული და შემოქმედებითი აქტივობების გაზრდა.

"ჩვენი მოსწავლეების მთელი ენერგია უნდა იხარჯებოდეს სწავლაში, შემოქმედებით აქტობებსა და სპორტში", - განაცხადა მიხეილ ჩხენკელმა.

მინისტრის განცხადებით, დაწყებულია ფართომასშტაბიანი სპორტული კამპანია სკოლებს შორის, რომელში გამარჯვებულიც ფინალში უცხოეთის მეგობარი სკოლის გამარჯვებულ გუნდს შეხვდება.

გაიგე მეტი: რა იცვლება საგანმანათლებლო სისტემაში - რეფორმა მოკლედ