ავღანეთში NATO-ს "მტკიცე მხარდაჭერის მისიის" ხელმძღვანელი, ბრიგადის გენერალი უილსონ შოფნერი აცხადებს, რომ სამხედრო ალიანსისა და ავღანეთის შეიარაღებული ძალების ერთობლივი მუშაობის შედეგად ქვეყანაში თალიბანისა და ISIS-ის პოზიციები სუსტდება.

"თალიბანი პატარ-პატარა ჯგუფებად იშლება და ორგანიზებული დაჯგუფების სახეს კარგავს, ხოლო ISIS-ის ავღანური ჯგუფი ნანგარჰარის პროვინციაშია მომწყვდეული და ჩვენი შეტევების შედეგად კიდევ უფრო სუსტდება." განაცხადა შოფნერმა პენტაგონის პრეს-ოთახში ჩართვისას.

მისივე განცხადებით, ISIS-ის ავღანურ ჯგუფს არ აქვს გარე კომუნიკაციის საშუალება, შესაბამისად ძირითადი ჯგუფისგან ვერც ფინანსურ და ვერც ინტელექტუალურ დახმარებას ვერ იღებს. ორგანიზაცია მხოლოდ ერთ პროვინციაშია გამაგრებული და მათი მცდელობა ავღანეთის სხვა რეგიონებში გაავრცელონ პროპაგანდა და მოახდინონ მებრძოლების რეკრუტირება წარუმატებელია.

ამასობაში თალიბანი რამდენიმე მცირე ჯგუფად დაიყო და მათი ერთმანეთთან თანამშრომლობა როგორ განვითარდება ჯერ უცნობია. აპრილში ავღანეთში ყაყაჩოს მოსავალს ელიან, სწორედ ამ პერიოდში ეცდებიან სხვადასხვა ჯგუფები ხელში ჩაიგდონ ნარკო-ტრასები, ყაყაჩოს ველები და შესაბამისად დიდი შემოსავალი მიიღონ. შოფნერის თქმით, ნარკობიზნესი დაშლილ თალიბანში კიდევ უფრო დიდი დაპირისპირების მიზეზი შეიძლება გახდეს.

არსებული შიდა დაპირისპირების გამო თალიბები შესაზლებელია ავღანეთის მთავრობასთან მოლაპარაკებაზე წავიდნენ, ხოლო ნაწილი შეიძლება ISIS-ის შეუერთდეს.