ევროპაბეთის დაყაჩაღების ფაქტზე შინაგან საქმეთა სამინისტრომ ორი პირი დააკავა.

შსს-ს განცხადებით გამოძიებამ დაადგინა, რომ ბრალდებულები მიმდინარე წლის 2 იანვარს თბილისში, ცაბაძის ქუჩაზე მდებარე ტოტალიზატორის - ევროპაბეთის შენობაში შეიჭრნენ, 165 000 ლარამდე თანხა გაიტაცეს და შემთხვევის ადგილიდან მიიმალნენ.

პოლიციამ დაკავებულების პირადი და საცხოვრებელი სახლების ჩხრეკისას, დანაშაულის ჩადენის იარაღი და გატაცებული თანხის ნაწილი ნივთმტკიცებად ამოიღო. ასევე, ამოღებულია მოტოციკლი, რომელიც ბრალდებულებმა დანაშაულის ჩასადენად გამოიყენეს და ნივთები, რომლებიც, პირველადი ინფორმაციით, გატაცებული თანხით არის შეძენილი.

გამოძიება ყაჩაღობის ფაქტზე საქართველოს სსკ-ს 179-ე მუხლის მე-2 და მე-3 ნაწილით მიმდინარეობს, რაც 6-დან 12-წლამდე თავისუფლების აღკვეთას ითვალისწინებს.