ევროსაბჭოს კონგრესი საქართველოს შესახებ ანგარიშს ამზადებს, რომლითაც საქართველოს ხელისუფლებას პოლიტიკური დიალოგის განახლებას, დაპატიმრებული ჟურნალისტების და პოლიტიკური ლიდერების გათავისუფლებას და იმ შესწორებების გაუქმებას სთხოვს, რომლებიც ხელს უწყობს ოპოზიციური პარტიების აკრძალვას.

"ტვ პირველის" ცნობით, ევროსაბჭოს კონგრესი მოუწოდებს საქართველოს ხელისუფლებას:

"სასწრაფოდ განაახლოს პოლიტიკური დიალოგი მმართველობის ყველა დონეზე, რომელშიც ყველა დაინტერესებული მხარე იქნება ჩართული, რათა შემცირდეს პოლარიზაცია და აღდგეს პლურალისტურ დემოკრატიაში აუცილებელი კონტროლისა და ბალანსის მექანიზმები;

გააუქმოს საარჩევნო კოდექსში შეტანილი პრობლემური ცვლილებები და განახორციელოს ყოვლისმომცველი რეფორმა, რომელსაც წინ უძღვის ფართო კონსულტაციები, რათა უზრუნველყოს ცენტრალური საარჩევნო კომისიის დამოუკიდებლობა და გამოასწოროს ყველა ძირითადი ხარვეზი;

დაუყოვნებლივ შეწყვიტოს ოპოზიციური ხმების კრიმინალიზაციის პროცესი და გააუქმოს ის შესწორებები, რომლებიც ხელს უწყობს ოპოზიციური პარტიების აკრძალვას;

ნამდვილი დიალოგის აუცილებელ წინაპირობად, კონგრესი ასევე მოუწოდებს ხელისუფლებას, გააუქმოს ყველა კანონმდებლობა, რომელიც არღვევს ადამიანის უფლებებს და თავი აარიდოს ნებისმიერ ქმედებას, რაც კიდევ უფრო შეაფერხებს სამოქალაქო საზოგადოებისა და მედია საშუალებების მუშაობას ან შეარყევს ადგილობრივი დემოკრატიის საფუძვლებს. კონგრესი ასევე რეკომენდაციას გასცემს ადგილობრივ დონეზე ძალადობის შესახებ ცნობების საფუძვლიანად გამოძიებასთან დაკავშირებით, განსაკუთრებით დაკავებულებისა და მომიტინგეების მიმართ,

ასევე მოუწოდებს ხელისუფლებას, გაათავისუფლონ დაპატიმრებული ჟურნალისტები და პოლიტიკური ლიდერები".

სტრასბურგში საქართველოს საკითხის განსახილველად 46 ქვეყნის ადგილობრივი და რეგიონული ხელისუფლებების კონგრესის დელეგატები ერთ კვირაში შეიკრიბებიან.