პირველად კანადის ავიაციის ისტორიაში, სამოყვარულო დრონი შეეჯახა სამგზავრო თვითმფრინავს, რამაც ქვეყანაში კიდევ ერთხელ გაააქტიურა დისკუსია დრონების რეგულირების გამკაცრების შესახებ.

კანადის ტრანსპორტის მინისტრმა მარკ გერნაუმ 16 ოქტომბერს თქვა, რომ ინციდენტი ქალაქ კვებეკის აეროპორტში, 450 მეტრის სიმაღლეზე მოხდა. მინისტრის თქმით, თვითმფრინავი, რომლის ბორტზეც 8 ადამიანი იმყოფებოდა, უმნიშვნელოდ დაზიანდა თუმცა, დრონი ძრავს, ან პილოტების კაბინას რომ შეჯახებოდა, გაცილებით სერიოზული შედეგი დადგებოდა.

კანადაში პირველი რეგულაციები სამოყვარულო დრონების გასაკონტროლებლად წელს მიიღეს, თუმცა 2018 წლიდან კანონის გამკაცრება კიდევ იგეგმება. ამჟამად, აეროპორტის 5 კილომეტრის რადიუსში აკრძალულია სამოყვარულო დრონების გამოყენება, ასევე, მისი მართვა დასაშვებია მხოლოდ თვალისთვის შესამჩნევ მანძილზე.

პირი, რომელიც საშიშროებას შეუქმნის ავიაუსაფრთხოებას, დაჯარიმდება 25 ათასამდე კანადური დოლარით, ან შეეფარდება პატიმრობა.

დრონების რეგულირებაზე დისკუსია კიდევ უფრო დიდ მნიშვნელობას იძენს იმ ფონზე, როცა ისეთი ინტერნეტ მაღაზიები, როგორიცაა ამაზონი, მიუვალ ადგილებში პროდუქციის მიწოდებას სწორედ დრონების გამოყენებით გეგმავენ.